თბილისის რესპუბლიკურ საავადმყოფოში, საპილოტე რეჟიმში, ახალი სახელფასო სისტემა დაინერგა, რომელიც სამედიცინო პერსონალისთვის საათების მიხედვით ანაზღაურების მინიმალურ ზღვარს აწესებს.

ჯანდაცვის სამინისტროსა და რეპუბლიკური საავადმყოფოს მიერ გავრცელებული განცხადების თანახმად, კლინიკის შემოსავლების 90% სახელმწიფო პროგრამებით მიღებული დაფინანსებაა. მისი ფინანსური მდგომარეობა, არსებული შემოსავალი და მარჟა იძლევა საშუალებას, რომ დღევანდელი ტარიფების პირობებში საავადმყოფოში დასაქმებულმა სამედიცინო პერსონალმა გაუმჯობესებული ანაზღაურება მიიღოს.

ამავე ინფორმაციით, თბილისის რესპუბლიკურ საავადმყოფოში, ახალი სახელფასო სისტემის მიხედვით, მინიმალური ანაზღაურება შემდეგია:

• ექიმი — საათში 9 ლარი, რაც ყოველთვიურად 1 620 ლარია.
• უმცროსი ექიმი — საათში 6 ლარია, თვეში კი — 1 080 ლარი
• ექთანი — საათში — 5,75 ლარი, თვიურად —1035 ლარი
• ექთნის დამხმარე — საათში 3 ლარია, თვეში — 540 ლარი.
• სანიტარი — საათში 2,80 ლარი, შესაბამისად, ყოველთვიურად — 504 ლარი.

მანამდე ჯანდაცვის მინისტრმა ზურაბ აზარაშვილმა განაცხადა, რომ „სახელმწიფო პროგრამებში მონაწილე კლინიკებს ექნებათ ვალდებულება, ექიმების, ექთნების, სანიტრებისა და სხვა რგოლის თანამშრომლებისთვის ანაზღაურების მინიმალური ზღვარი დააწესონ ისე, რომ მათი ხელფასები ღირსეული იყოს“.