ახალი ამბები

„ფორმულას“ ჟურნალისტსა და ოპერატორებზე თავდამსხმელს პროკურატურამ ბრალი წარუდგინა

20 მარტი, 2022 • 1473
„ფორმულას“ ჟურნალისტსა და ოპერატორებზე თავდამსხმელს პროკურატურამ ბრალი წარუდგინა

პროკურატურამ ტელეკომპანია „ფორმულას“ ჟურნალისტსა და ოპერატორებზე თავდამსხმელ დავით ველიჯანაშვილს ბრალი წარუდგინა.

პროკურატურის ცნობით, ველიჯანაშვილს ბრალი პროფესიულ საქმიანობაში უკანონოდ ხელის შეშლის და დევნის ფაქტზე ბრალდება საქართველოს სისხლის სამართლის კოდექსის 154-ე მუხლის მე-2 ნაწილითა და 156-ე მუხლის მე-2 ნაწილის „ა“ ქვეპუნქტით, რაც სასჯელის სახედ და ზომად 3 წლამდე თავისუფლების აღკვეთას ითვალისწინებს.

დავით ველიჯანაშვილი სპეციალური საგამოძიებო სამსახურის თანამშრომლებმა 18 მარტს დააკავეს და პროკურატურამ მის მიმართ აღკვეთის ღონისძიების სახით პატიმრობის შეფარდების შუამდგომლობით თბილისის საქალაქო სასამართლოს უკვე მიმართა.

„სპეციალური საგამოძიებო სამსახურის მიერ ჩატარებული გამოძებით დადგინდა, რომ 17 მარტს, დაახლოებით, 19:00 საათზე, ტელეკომპანია „ფორმულას“ ჟურნალისტი ნ.ჩ., შპს „დროება მედია ჯგუფის“ ოპერატორი ა.ნ. და ვიდეო ოპერატორის თანაშემწე გ.ც, ჟურნალისტის პროფესიული საქმიანობის, კერძოდ, რესპოდენტთან ინტერვიუს ჩაწერის მიზნით, იმყოფებოდნენ თბილისში, ი. აბაშიძის ქუჩაზე მდებარე ერთ-ერთ ბარში. ტელეკომპანია „ფორმულაში“ მუშაობის გამო, ჟურნალისტების მიმართ უკმაყოფილება გამოხატა ბარში მყოფმა დ.ვ.-მ, რომელმაც შეურაცხმყოფელი შეძახილით, გინებით, ფიზიკური ანგარიშსწორებისა და გასროლის მუქარით სამივე ჟურნალისტისგან მოითხოვა პროფესიული საქმიანობის, კერძოდ, ინტერვიუს ჩაწერის შეწყვეტა და ბარის დატოვება. მუქარისა და სიტყვიერი შეურაცხყოფის პარალელურად, დ.ვ.-მ სამივე ჟურნალისტს მიაყენა ფიზიკური დაზიანებები.

დ.ვ.-მ ძალადობითა და ძალადობის მუქარით, ტელეკომპანია „ფორმულასა“ და მისი ჟურნალისტების მიმართ ნეგატიური შეხედულების გამო განახორციელა მათი დევნა პროფესიულ მოღვაწეობასთან დაკავშირებით და ხელი შეუშალა ჟურნალისტის პროფესიული საქმიანობის განხორციელებაში“, – ნათქვამია პროკურატურის განცხადებაში.

მასალების გადაბეჭდვის წესი