შეერთებული შტატების სახელმწიფო მდივანი ენტონი ბლინკენი ხუთშაბათს აღმოსავლეთ ევროპაში გაემგზავრა უკრაინის საკითხთან დაკავშირებით ნატოს მოკავშირეებთან და სხვა ევროპელ ლიდერებთან შესახვედრად.
სახელმწიფო დეპარტამენტის პრეს-ცენტრის ცნობით, ბლინკენი ჯერ ჩავა ბრიუსელში ნატოს მინისტერიალზე, შაბათს კი პოლონეთში გაემგზავრება და შეხვედრას გამართავს ქვეყნის ლიდერებთან.
იმავე დღეს იგი გეგმავს მოლდოვაში გამგზავრებას და პრეზიდენტ მაია სანდუსთან, ასევე, პრემიერ-მინისტრსა და საგარეო საქმეთა მინისტრთან შეხვედრას.
6-8 მარტის შუალედში კი იგი ეწვევა ლიეტუვას, ლატვიასა და ესტონეთს, რათა უკრაინის საკითხი განიხილოს და „გააძლიეროს ნატოს თავდაცვის ძალები“.
პრეს-რელიზში არ არის საუბარი მის ვიზიტზე საქართველოში. თუმცა 3 მარტს პრეზიდენტმა ზურაბიშვილმა განაცხადა, რომ ბლინკენთან სატელეფონო საუბრისას იმედი გამოთქვა, რომ ენტონი ბლინკენი მალე ეწვევა საქართველოს.
