საქართველოს მთავრობამ დღევანდელ სხდომაზე განიხილა პროექტი „წამლისა და ფარმაცევტული საქმიანობის შესახებ“ საქართველოს კანონში ცვლილებების შეტანის თაობაზე, რომლის თანახმად, ფარმაცევტული პროდუქტის საქართველოში შემოტანის მიზნით, იმპორტიორებისათვის სავალდებულო ხდება ფარმაცევტული პროდუქტის GMP-ის (კარგი საწარმოო პრაქტიკის) სტანდარტით წარმოების დამადასტურებელი საბუთის წარდგენა.
კარგი საწარმოო პრაქტიკა გულისხმობს პროდუქციის წარმოებისას უსაფრთხოებისა და ხარისხის უზრუნველყოფის წესების დაცვას.
GMP-ის სტანდარტის დოკუმენტის, სავალდებულო წესით წარდგენის ეტაპობრიობასა და პირობებს მიმდინარე წლის მარტამდე საქართველოს მთავრობა განსაზღვრავს.
მთავრობის განცხადებით, ცვლილების მიზანია, უზრუნველყოფილი იყოს თანაბარი მიდგომები ფარმაცევტული პროდუქტის მწარმოებლებს, საბითუმო რეალიზატორებსა და იმპორტიორებს შორის. მთავრობა პარლამენტს კანონპროექტის დაჩქარებული წესით განხილვის თხოვნით მიმართავს.
აღნიშნულს წინ უძღოდა მთავრობის გადაწყვეტილება თურქეთიდან მედიკამენტების იმპორტის დაშვების შესახებ, რამაც, მათი განცხადებით, წამლები უნდა გააიაფოს.
წამლების ფასებისა და დაგეგმილი რეგულაციების შესახებ იხილეთ ნეტგაზეთის მასალები არქივიდან:
