ჯანდაცვის მსოფლიო ორგანიზაცია [ჯანმო] ამბობს, რომ კორონავირუსის ახალი შტამი „ომიკრონი“ მომავალ კვირებში ევროპის მოსახლეობის ნახევარზე მეტს დააავადებს.
როგორც ჯანმოს ევროპის წარმომადგენლობის ხელმძღვანელი, ჰანს კლიუგე განმარტავს, 2022 წლის პირველ კვირაში ევროპაში „ომიკრონის“ 7 მილიონზე მეტი ახალი შემთხვევა დაფიქსირდა.
„ამ მონაცემებით, Institute for Health Metrics and Evaluation-ის [ჯანდაცვის გაზომვისა და შეფასების ინსტიტუტი] პროგნოზის თანახმად, მომდევნო 6-8 კვირაში რეგიონშიმოსახლეობის 50%-ზე მეტი დაინფიცირდება „ომიკრონით“,“ – ამბობს კლიუგე.
ჰანს კლიუგე ასევე დასძენს, რომ ჯერჯერობით ნაადრევია „ომიკრონს“ „მოვეპყროთ, როგორც გრიპისმაგვარ დაავადებას“.
„ომიკრონის“ შემთხვევები საქართველოში პირველად 2021 წლის დეკემბრის ბოლოს დაფიქსირდა. როგორც დაავადებათა კონტროლის ეროვნულ ცენტრში [NCDC] აცხადებენ, ჯერჯერობით, „ომიკრონით“ ინფიცირებულ არცერთ პაციენტს რეანიმაციული დახმარება არ დასჭირვებია.
NCDC-ს ხელმძღვანელის, ამირან გამყრელიძის თქმით, საქართველოში ომიკრონის 621 შესწავლილი შემთხვევიდან ჰოსპიტალიზაცია მხოლოდ 11-ს დასჭირდა, რომელთაგან 7 ადამიანი, 11 იანვრის მდგომარეობით, კლინიკებიდან უკვე გაწერილი იყო. გამყრელიძის ინფორმაციითვე, მათ უმეტესობას სხვა ქრონიკული დაავადებები ჰქონდათ.
თებერვალში შესაძლოა, დღიურად ომიკრონის 60 ათასამდე შემთხვევა გვქონდეს — გამყრელიძე
