ახალი ამბები

სასამართლომ უარი თქვა კოვიდგადატანილებისთვის უვადო “მწვანე სტატუსის” შეჩერებაზე – PHR

2 დეკემბერი, 2021 • 2398
სასამართლომ უარი თქვა კოვიდგადატანილებისთვის უვადო “მწვანე სტატუსის” შეჩერებაზე – PHR

თბილისის საქალაქო სასამართლომ არ დააკმაყოფილა შუამდგომლობა, რომელიც კოვიდგადატანილი მოქალაქეებისთვის ე.წ. უვადო „მწვანე პასპორტის“ მინიჭებაზე მთავრობის გადაწყვეტილების შეჩერებას ითხოვდა.

ინფორმაციას ორგანიზაცია „პარტიორობა ადამიანის უფლებებისთვის“(PHR)  ავრცელებს.

სწორედ ეს ორგანიზაცია ითხოვდა, რომ გამოცემულიყო დროებითი ღონისძიება, რომელიც მთავრობას „მწვანე პასპორტებთან” დაკავშირებით „სამეცინიერო მტკიცებულებაზე დაფუძნებული გადაწყვეტილების” მიღებას დაავალებს.

PHR სარჩელის შეტანისას ამბობდა, რომ სამედიცინო სფეროს ყველა წარმომადგენელი, რომელიც კოვიდ თემაზე მუშაობს, ეწინააღმდეგებოდა მთავრობის ამ გადაწყვეტილებას, მათ შორის ისინი, ვინც საკოორდინაციო საბჭოში შედიან, რადგან მხოლოდ მხოლოდ ინფექციის გადატანის საფუძველზე უვადო „მწვანე პასპორტის“ გაცემა  შესაძლოა სარისკო აღმოჩნდეს სხვების ჯანმრთელობისთვის.

„სასამართლომ თქვა, რომ ბუნდოვანია, რას ითხოვენ მოსარჩელეები და მათი მოთხოვნა იმდენად ზოგადია, რომ სასამართლო მას ვერ დააკმაყოფილებს.

სასამართლომ არ მიიჩნია ექსპერტების (გამყრელიძის, ცერცვაძის, კულუმბეგოვის და სხვების მოსაზრებები) საკმარისად და მოსარჩელეს მოსთხოვა მეცნიერულად დაამტკიცოს, რომ კოვიდგადატანილ პირებს არ აქვთ უვადო იმუნიტეტი. ანუ, იმის ნაცვლად, რომ მთავრობამ თავისი გადაწყვეტილება უვადო მწვანე სტატუსის მინიჭებაზე დააყრდნოს მტკიცებულებას (შემოგვთავაზოს იმ ფაქტის დადასტურება, რომ უვადო იმუნიტეტი არსებობს), მოქალაქეებმა უნდა უმტკიცონ მთავრობას, რომ მტკიცებულება არ არსებობს (ანუ მოსარჩელეებმა უნდა ამტკიცონ ფაქტის არარსებობა). რაც სამართლებრივად შეუძლებელია – ფაქტის მტკიცება ევალება მას, ვინც ფაქტი (უვადო კოვიდ იმუნიტეტი) სამართლებრივად გააფორმა მთავრობის დადგენილებაში.

მოკლედ რომ შევაჯამოთ, მოსამართლემ მთავრობას ამ გადაწყვეტილებით უთხრა, რომ მათ არ ევალებათ თავისი აქტების დასაბუთება, მოქალაქეებმა უნდა ასაბუთო,ნ რომ აქტი კანონს არღვევდა. დაბოლოს, სასამართლომ ვერ დაინახა სარჩელის პერსპექტიულობა და მისი დაუკმაყოფილებლობით გამოწვეული საფრთხე, ანუ ის, რომ უვადო მწვანე სტატუსი მოსარჩელეების სიცოცხლეს და ჯანმრთელობას დააზიანებს“, – აცხადებს ორგანიზაცია.

PHR ამბობს, რომ ამ გადაწყვეტილებას სააპელაციო სასამართლოში გაასაჩივრებს.

ნახეთ ასევე:

სასამართლოს კოვიდგადატანილებისთვის უვადო “მწვანე სტატუსის” გადაწყვეტილების შეჩერებას სთხოვენ


1 დეკემბერიდან საქართველოში ე.წ. „მწვანე პასპორტი“ ამოქმედდება. 18 წელს გადაცილებულ მოქალაქეებს “მწვანე პასპორტის” წარდგენა მოეთხოვებათ კვების ობიექტებში, სასტუმროებში, კინოთეატრებში, საკონცერტო დარბაზებში, გასართობ ცენტრებში, სამორინეებსა და სათამაშო ბიზნესის ობიექტებზე, ფიტნესდარბაზებში და სხვა. “მწვანე პასპორტი” აუცილებელი არ არის საზოგადოებრივ ტრანსპორტში და სურსათის მაღაზიებში.

მწვანე სტატუსი აქვს პირს, თუ იგი ვაქცინირებულია სრულად, ჩატარებული აქვს 72-საათიანი ვალიდურობის PCR-ტესტი ან 24-საათიანი ვალიდურობის ანტიგენ-ტესტი. ამასთან, ადამიანმა ერთხელ თუ გადაიტანა კორონავირუსი, ქართულ დოკუმენტში მუდმივ „მწვანე სტატუსს” ანიჭებენ.

ექიმების აზრით, ამ მიდგომას საერთო არაფერი აქვს მეცნიერებასთან და არ მოქმედებს არცერთ ქვეყანაში. თუმცა პრემიერ-მინისტრმა ირაკლი ღარიბაშვილმა არ გაითვალისწინა დარგის სპეციალისტების და დაავადებათა კონტროლის ეროვნული ცენტრის რეკომენდაცია, კოვიდგადატანილის “მწვანე სტატუსი” გარკვეული პერიოდით (6 თვე) შემოიფარგლოს.

რა პრობლემა აქვს ქართულ „მწვანე პასპორტს”

მასალების გადაბეჭდვის წესი