ჯანდაცვის კომიტეტის თავმჯდომარე დიმიტრი ხუნდაძე აცხადებს, რომ გეგმავს მიხეილ სააკაშვილის მე-18 დაწესებულებაში მონახულებას. „ვაპირებთ შესვლას“, – ამბობს იგი.

ჟურნალისტის კითხვაზე, ჯობია თუ არა სააკაშვილის მაღალპროფილურ სამოქალაქო კლინიკაში გადაყვანა, ხუნდაძემ უპასუხა:

„რომ მივიღოთ გადაწყვეტილება, გადავიყვანოთ თუ ადგილზე მოვემსახუროთ, ამიტომ უნდა შევიდეთ და არა იმიტომ, რომ მე მენატრება იმ სივრცის მონახულება“.

პარლამენტარი ასევე აცხადებს, რომ სააკაშვილის „ჯანრმთელობის გარანტი არის ის ბრიგადა, რომელიც ადგილზე მუშაობს“.

დიმიტრი ხუნდაძემ ასევე მოუწოდა სააკაშვილს, შეწყვიტოს შიმშილობა: „არ შეიძლება მისი შიმშილობის რეჟიმში ცხოვრობდეს მთელი ქვეყანა“.

პენიტენციური სამსახურის განცხადებით, მიხეილ სააკაშვილის ჯანმრთელობის მდგომარეობა სტაბილურია.

„ცოტა ხანში ექიმი რეანიმატოლოგი გააკეთებს კომენტარს მედიისთვის“, — ნათქვამია უწყების მიერ სოციალურ ქსელში გავრცელებულ ინფორმაციაში.