ახალი ამბები

ზუგდიდში საარჩევნო უბნების ნაწილი ხმაურის ფონზე გაიხსნა

30 ოქტომბერი, 2021 • 751
ზუგდიდში საარჩევნო უბნების ნაწილი ხმაურის ფონზე გაიხსნა

მერის არჩევნების მეორე ტურში ხმის მიცემის პროცესი ზუგდიდის რამდენიმე საარჩევნო უბანზე ხმაურის ფონზე დაიწყო.

როგორც „ნაციონალურ მოძრაობაში“ ამბობენ, ახალსოფელში 36-ე და ზედაეწერში 72-ე უბნებზე დამკვირვებლებს რეგისტრაციის მაგიდასთან დგომის უფლებას არ აძლევდნენ.

ამასთან, 73-ე უბანთან (ცაიშში) მობილიზებული იყო ორი ავტომობილი, სადაც, სავარაუდოდ, „ქართული ოცნების“ კოორდინატორები ისხდნენ.

„მივდივარ… ვდგავარ… ეს ჩემი სოფელია და უნდა დავდგე აქ“, – ამბობს ერთ-ერთ მანქანაში მჯდომი პირი. ვიდეოს ენმ ავრცელებს. მას პარტიის წარმომადგენელი პასუხობ, რომ არ აქვს უბნიდან 100 მეტრის რადიუსში დგომის უფლება.

მას შემდეგ, რაც ენმ-ის წარმომადგენელმა პოლიცია გამოიძახა, მათ მიმდებარე ტერიტორია დატოვეს.

ცესკოს პასუხი

ზუგდიდის 67-ე საოლქო საარჩევნო კომისიის თავმჯდომარე მირანდა მესხმა განაცხადა, რომ:

  • სამაგიდო სიებთან წვდომა კანონმდებლობით მხოლოდ კომისიის წევრებს აქვთ და არა დამკვირვებლებს;
  • უბანი გარე პერიმეტრს ვერ აკონტროლებს და მსგავსი ფაქტების უბნის 100-მეტრიან რადიუსში დაფიქსირების შემთხვევაში სამართალდამცავებმა უნდა იმოქმედონ.

წინა დღით „ქართული ოცნების“ მაჟორიტარმა დეპუტატმა ზუგდიდიდან, ირაკლი ჩიქოვანმა განაცხადა, რომ მმართველი გუნდის მხარდამჭერებს „ექნებათ გარკვეული სიები“:

„ეს ინფორმაცია არ შეიცავს კონფიდენციალურ ინფორმაციას. შესაბამისად, ეს ადამიანები იქნებიან და დაიცავენ 100- მეტრიან პერიმეტრს“, – განაცხადა ჩიქოვანმა და თქვა, რომ ამით კანონს არ არღვევენ.

მირანდა მესხის თქმითვე, 7:00 საათის მონაცემებით, ყველა, 109-ვე უბანი უბანი გაიხსნა. 67-ე ოლქში, ჯამში, 119 798 ამომრჩეველია რეგისტრირებული.

მელია vs წოწერია

ზუგდიდის მერობისთვის იბრძვიან საკრებულოს მოქმედი თავმჯდომარე მამუკა წოწერია და ანზორ მელია (ნიკა მელიას მამა).

პირველ ტურში „ქართული ოცნების“ კანდიდატმა 41.15% მიიღო, „ნაციონალური მოძრაობის“ კანდიდატმა კი – 46.88%.

ამასთან, საკრებულოს 45 წევრიდან 44-ის ვინაობა უკვე გარკვეულია. საკრებულოში 22 ადგილი ენმ-ს აქვს, 19- „ქართულ ოცნებას“, 3 კი- გიორგი გახარიას პარტიას „საქართველოსთვის“.

საკრებულოს უმრავლესობის ბედი წყდება ზუგდიდის მე-4 მაჟორიტარულ ოლქში, ანუ სულ 7 უბანზე (კერძოდ, 67-ე, 73-ე, 74-ე, 76-ე, 77-ე, 103-ე და 106-ე უბნებზე).

აღნიშნულ ოლქში ენმ-ის კანდიდატ ზვიად ჯღარკავას პირველ ტურში 39.836% ჰქონდა, „ოცნების“ ირაკლი ჯანაშიას კი- 38.95%.

ბრალდებები არჩევნებსის წინ

ზუგდიდში მეორე ტურს წინ უძღოდა „ნაციონალური მოძრაობის“ ბრალდებები „ქართული ოცნების“ ხელისუფლების მიერ ენმ-ის აქტიური მხარდამჭერი ყოფილი ძალოვნების უკანონოდ დაკავებისა და მათთვის იარაღის ჩადების შესახებ.

30 ოქტომბერს, შუაღამისას, ენმ-ის ზუგდიდის ოფისის ხელმძღვანელმა, პარლამენტარმა ანი წითლიძემ განაცხადა, რომ პარტიის მხარდამჭერს, რომელიც ქვეყანაში სპეციალურად ხმის მისაცემად ჩავიდა, ზუგდიდში პოლიტიკური მოტივით თავს დაესხნენ და სცემეს.

მასალების გადაბეჭდვის წესი