ახალი ამბები | , ,

თანხა, რომელიც თბილისობაზე უნდა დახარჯულიყო, ბათუმში დაზარალებულებს გადაეცემათ – კალაძე

9 ოქტომბერი, 2021 | | 6782
თანხა, რომელიც თბილისობაზე უნდა დახარჯულიყო, ბათუმში დაზარალებულებს გადაეცემათ – კალაძე

თბილისის მერი, კახა კალაძე ამბობს, რომ თანხა, რომელიც „თბილისობის“ ღონისძიებაზე უნდა დახარჯულიყო ბათუმში კორპუსის ნგრევის შედაგად დაზარალებულებს გადაეცემათ.

კალაძე თავის განცხადებაში უსამძიმრებს ბათუმსა და მთელ ქვეყანას, ამბობს, რომ ტრაგედია საერთო ტკივილია.

„დღესაც, ამ მძიმე წუთებში, თბილისი დგას ბათუმის გვერდით. ჩვენი გუნდის გადაწყვეტილებით, ღონისძიება, რომელიც სატელევიზიო ფორმატით თბილისობის აღსანიშნავად უნდა ჩატარებულიყო, გაუქმდება. გამოყოფილი თანხა კი გადაირიცხება ბათუმში მომხდარი ტრაგედიის დროს გარდაცვლილთა ოჯახებისა და დაზარალებულთა დახმარების ფონდში,“ – წერს კალაძე.

საუბარია „თბილისობის“ წლევანდელ ღონისძიებაზე, რომელსაც პანდემიის გამო მოქალაქეები ვერ დაესწრებოდნენ. ამ დღეს უნდა გამართულიყო კონცერტი, რომელიც პირდაპირ ეთერში გადაიცემოდა და საპატიო თბილისელთა დაჯილდოვება.

ამ ყველაფერზე უნდა დახარულიყო 494 ათასი ლარი. 


ბათუმში, 26 მაისის ქუჩაზე, 6-სართულიანი სახლის სადარბაზო 8 ოქტომბერს, მოულოდნელად ჩამოინგრა. ჩამონგრევას წინ არ უძღოდა აფეთქების ხმა.

ბათუმში ჩამონგრეული კორპუსის სადარბაზოსთან მაშველები აგრძელებენ მუშაობას. ამ დროისთვის ნანგრევებიდან ცოცხლად ამოყვანილია 2 ადამიანი, ისინი კლინიკაში გადაიყვანეს. დილით ცნობილი გახდა, რომ ნანგრევებიდან ამოყვანილი ინგა მეკეიძე საავადმყოფოში გარდაიცვალა. მაშველებმა ასევე ამოასვენეს 7 ცხედარი, მათგან სამი– ბავშვია.

შინაგან საქმეთა სამინისტროს ინფორმაციით, ამ ეტაპზე დაკავებულია 3 პირი – პირველ სართულზე არსებული ბინის მეპატრონე და ორი მუშა. უწყება ამბობს, რომ მესაკუთრის დავალებით დაქირავებულმა მუშებმა ხარვეზიანად წარმართეს სარემონტო სამუშაოები, რამაც, საბოლოოდ ნგრევა გამოიწვია.

საქართველოში 11 ოქტომბერი გლოვის დღედ გამოცხადდა

მასალების გადაბეჭდვის წესი