ახალი ამბები | , ,

პარტიები: დახმარებაზე “ოცნების” უარის მიზანი ევროატლანტიკური სვლისთვის ხელის შეშლაა

2 სექტემბერი, 2021 | | 589
პარტიები: დახმარებაზე “ოცნების” უარის მიზანი ევროატლანტიკური სვლისთვის ხელის შეშლაა

14 ოპოზიციური პოლიტიკური პარტია ღია წერილს ავრცელებს და ევროპული საბჭოს პრეზიდენტს, ევროპული კომისიის პრეზიდენტს, ევროპული პარლამენტის პრეზიდენტს და ნატოს გენერალურ მდივანს მიმართავს.

წერილზე ხელმომწერი პარტიები აცხადებენ, რომ მათთვის ძალიან დიდი განგაშისა და იმედგაცრუების მიზეზია საქართველოს მთავრობის მიერ ევროკავშირისთვის წინდაუხედავი უარის თქმა იმ მაკროდაფინანსებაზე, რომელიც ქვეყანაში სასამართლოს რეფორმის იმპლემენტაციას უნდა მოხმარებოდა და მიიჩნევენ, რომ მომხდარი საქართველოს მომავლისთვის უდიდეს პრობლემას წარმოადგენს:

“ეს სრულიად წინააღმდეგობრივი ნაბიჯი ჩვენი ქვეყნის ისტორიაში უპრეცედენტოა და ერთ-ერთია იმ მოვლენათა კასკადიდან, რომელიც ქართველი ხალხის ისტორიული ნება-სურვილის საწინააღმდეგოდ, ევროატლანტიკური სვლისთვის ხელის შეშლას ისახავს მიზნად.

საუკუნეების განმავლობაში ქართველი ხალხი შეუჩერებლად და დაუღალავად იბრძოდა საქართველოს ევროატლანტიკური ინტეგრაციისათვის. მნიშვნელოვანი უმრავლესობა ახლაც იმავე პოზიციაზეა – მოქალაქეთა 80%-სთვის ევროკავშირი და ნატო დღემდე უალტერნატივო არჩევანს წარმოადგენს. შესაბამისად, ყველა არჩევნებზე ამომრჩეველი ხმას აძლევს იმ პარტიებს, რომლებიც მას ქვეყნის ევროკავშირთან და ნატოსთან დაახლოებას ჰპირდება”, – ვკითხულობთ წერილში.

ხელმომწერთა თქმით, გასულ წელს “ქართული ოცნების” მთავრობამ ცხადად აჩვენა, რომ მათი ევროკავშირთან დაახლოების ამბიცია სხვა არაფერია, თუ არა ფასადი, რომლის მიზანიც ქართველი ხალხის მოტყუებაა. პარტიებში აცხადებენ, რომ ამ ფასადის მიღმა არაფორმალური სისტემის მიერ სახელმწიფოს ყოვლისმომცველი მიტაცების მომსწრენი გახდნენ, ყველაფრის ბოლო წვეთი კი სასამართლო სისტემის სრული დამორჩილება აღმოჩნდა:

“5 ივლისი – დღე, როდესაც პრემიერ-მინისტრმა ღარიბაშვილმა რუსეთთან და ქართულ ოცნებასთან დაახლოებული ექსტრემისტების მიერ თბილისი პრაიდის
დარბევა წაახალისა, რაც შემდგომში 53 ჟურნალისტზე ფიზიკური თავდასხმით და რამდენიმე დღეში ერთ-ერთი მათგანის გარდაცვალებით დასრულდა, ამ კონტექსტში ერთ-ერთი საკვანძო მოვლენა იყო. ორგანიზებული მასობრივი დანაშაული რამდენიმე საათის მანძილზე ყოველგვარი საპოლიციო წინააღმდეგობის გარეშე მიმდინარეობდა – მთავარი ორგანიზატორები დღემდე არ არიან დასჯილნი.

იმან, რომ თავდაპირველი ვალდებულებების შემდეგ ქართულმა ოცნებამ უხეშად დაარღვია 19 აპრილის შეთანხმების პირობები და საერთოდ დატოვა მოლაპარაკების ფორმატი, ხოლო ახლა დაფინანსებაზეც უარი განაცხადა, ამ სახიფათო ტრაექტორიას კიდევ უფრო აუარესებს. მიუხედავად იმისა, რომ ჩვენი ამოცანაა, ამ საფრთხეს წინააღმდეგობა საქართველოს ევროპულ და ევროატლანტიკურ გზაზე სვლით გავუწიოთ და სიტუაცია შემოვაბრუნოთ, ვთვლით, ამ სიტუაციის შესაჩერებლად სწორედ ახლაა საჭირო ლეგიტიმური ბერკეტებისა და გავლენების გამოყენება”, – ვკითხულობთ ღია წერილში.

განცხადების ავტორები აღნიშნავენ, რომ შეთანხმების მიხედვით, რომელსაც “ქართულმა ოცნებამ” მოაწერა ხელი, საქართველოს მთავრობა ვალდებული იყო, ვადამდელი საპარლამენტო არჩევნები ჩაეტარებინა, თუკი მმართველი პარტია ამ ოქტომბრის ადგილობრივი თვითმმართველობის არჩევნებში 43%-ის აღებას ვერ მოახერხებდა.

ხელმომწერი ოპოზიციური პარტიები ამბობენ, რომ მათ სჯერათ, ქართული საზოგადოება ოქტომბერში გამოიტანს პოლიტიკურ ვერდიქტს, ხოლო ევროკავშირი და ნატო, დაუჭერს რა მხარს ქართველი ხალხის დემოკრატიულ არჩევანს, ახალი არჩევნების ჩატარებას დაუყოვნებლივ მოითხოვს:

“ჩვენ გავაკეთებთ ყველაფერს მოქალაქეთა ხმების დასაცავად და იმისთვის, რომ საქართველო დარჩეს თავისუფლების, დემოკრატიის და კანონის უზენაესობის ერთგულ სახელმწიფოდ. გვსურს, კიდევ ერთხელ გადაგიხადოთ მადლობა ქართული დემოკრატიის შენარჩუნებისთვის გაწეული ძალისხმევისა და ერთგულებისათვის. იმედი გვაქვს თქვენი უწყვეტი პოლიტიკური და მორალური მხარდაჭერისა თავისუფალი და სამართლიანი არჩევნების უზრუნველსაყოფად”, – ნათქვამია ღია წერილში.

დოკუმენტს ხელს აწერენ:

  • ერთიანი ნაციონალური მოძრაობა
  • გირჩი – მეტი თავისუფლება
  • ევროპული საქართველო
  • ელენე ხოშტარია – დროა
  • სტრატეგია აღმაშენებელ
  • საქართველოს რესპუბლიკური პარტია
  • ლელო საქართველოსთვის
  • თავისუფალი დემოკრატები
  • ქრისტიან-დემოკრატები
  • ევროპელი დემოკრატები
  • ეროვნული დემოკრატიული პარტია
  • მოძრაობა სახელმწიფო ხალხისთვის
  • სამოქალაქო ალიანსი თავისუფლებისთვის
  • კანონი და სამართალი
  • ტარიელ ნაკაიძე, დამოუკიდებელი დეპუტატი

პრემიერ-მინისტრმა ირაკლი ღარიბაშვილმა, 31 აგვისტოს განაცხადა, რომ საქართველოს მთავრობას გადაწყვეტილი აქვს, ევროკავშირისგან 2021 წელს მაკროფინანსური დახმარების მეორე ტრანში არ მიიღოს.

ამის არგუმენტად ღარიბაშვილმა დაასახელა, ერთი მხრივ, „საქართველოში მაღალ ეკონომიკურ ზრდა, მეორე მხრივ კი, საგარეო ვალის შემცირების სურვილი.

ევროკავშირი დახმარების პირობად ასახელებდა საქართველოს მთავრობის/პარლამენტის მიერ რეფორმების გატარებას, მათ შორის, სასამართლო რეფორმას.

ღარიბაშვილის თქმით, მთავრობა არ მიიღებს ევროკავშირისგან მიკროფინანსურ დახმარებას

მასალების გადაბეჭდვის წესი