ადგილობრივი ოფიციალური პირები და საერთაშორისო მედიასაშუალებები იუწყებიან, რომ თალიბანმა დაიკავა მაზარ-ი-შარიფი: უკანასკნელი საკვანძო ქალაქი ქვეყნის ჩრდილოეთში, რომელსაც შაბათის საღამომდე აკონტროლებდა ავღანეთის მთავრობა. ამ მოცემულობით, დაჯგუფებამ მთლიანად დაამყარა კონტროლი ავღანეთის ჩრდილოეთ ნაწილზე.

მაზარ-ი-შარიფი, რომელიც ბალხის პროვინციის დედაქალაქია, დაჯგუფების სხელში აღმოჩნდა მას შემდეგ, რაც 2 დღით ადრე მისმა მებრძოლებმა 2 საკვანძო ქალაქი დაიკავეს ქვეყნის დასავლეთსა და სამხრეთში. New York Times-ის მიხედვით, დაჯგუფებამ ჩრდილოეთის უკანასკნელ ბასტიონზე მისი საზღვრების გადალახვიდან სულ 1 საათში დაამყარა კონტროლი.

მაზარ-ი-შარიფში თალიბანის შესვლიდან მალევე, ქალქი დატოვეს როგორც სამთავრობო ძალებმა, ისე ადგილობრივი მეთაურების – მარშალ აბდულ რაშიდ დოსთუმისა და ათა მუჰამად ნურის – მილიციებმა.

“სამთავრობო ძალებმა და სახალხო [რაზმებმა], ყველამ დატოვა ქალაქი. თალიბანმა დაიკავა სამთავრობო და სამხედრო შენობები. წინააღმდეგობა არ ყოფილა”, – ციტირებს გამოცემა ჰაშიმ აჰმადზაის, პრო-სამთავრობო მილიციის მეთაურს.

თალიბანი ახლა ეფექტურად აკონტროლებს როგორც ავღანეთის სამხრეთს, ისე დასავლეთსა და ჩრდილოეთს. დაჯგუფების წინსვლას, ჯერჯერობით, ვერაფერი აკავებს. ის განსაკუთრებით გააქტიურდა მას შემდეგ, რაც აშშ-მა და სხვა ქვეყნებმა, 20-წლიანი სამხედრო ოპერაციების შემდეგ, ქვეყნის დატოვების გადაწყვეტილება მიიღეს.

თალიბანმა ბოლო ორი კვირის მანძილზე ავღანეთის რეგიონული დედაქალაქების ნახევარზე მეტი აიღო. მაზარ-ი-შარიფის დაკავების შემდეგ კი, მხოლოდ 2 საკვანძო ქალაქი რჩება მთავრობის კონტროლქვეშ: დედაქალაქი ქაბული და პაკისტანის საზღვართან მდებარე ჯალალაბადი.