ავღანეთში მიწისძვრას 2000-ზე მეტი ადამიანი ემსხვერპლა.
ამის შესახებ ინფორმაციას საერთაშორისო მედია თალიბანზე დაყრდნობით ავრცელებს. მიწისძვრის შედეგად დაღუპულთა შესახებ ბოლო ინფორმაცია თალიბანმა კვირას, 8 ოქტომბერს, გაავრცელა.
6.3 მაგნიტუდის სიმძლავრის მიწისძვრა ავღანეთის დასავლეთ ნაწილში, ჰერატის პროვინციაში, შაბათს, 7 ოქტომბერს მოხდა.
თალიბანის სპიკერის განცხადებით, მიწისძვრის შედეგად დაშავდა 1000-ზე მეტი ადამიანი და მთლიანად ან ნაწილობრივ დანგრეულია 1320 სახლი, ასევე არ გამორიცხავენ, რომ მსხვერპლი შეიძლება კიდევ გაიზარდოს.