ქუთაისში მდებარე “სირცხვილიას” ოფისს ქვა ესროლეს და ფანჯარა ჩაამსხვრიეს. შემთხვევა გუშინ, 8 ივლისს, მოხდა.
როგორც “სირცხვილიას” წარმომადგენლები ამბობენ, ოფისზე თავდასხმა გვიან ღამით მოხდა და იმ დროისთვის შენობაში არავინ იყო. მოძრაობის წევრები ქუთაისის ოფისზე თავდასხმას 5 ივლისს თბილისში გამართული ძალადობრივი აქციის გაგრძელებად აღიქვამენ, რა დროსაც თავს “სირცხვილიას” თბილისის ოფისსაც დაესხნენ.
“99%-ით დარწმუნებული ვარ, რომ ან ეს არის იმ აგორებული სიძულვილის გამოძახილი, სადაც მღვდლები მოგვიწოდებდბნენ, რომ სიწმინდისთვის იძალადეთო, ან პირადპირ ვიღაც სუს-ის მოცლილი, რომელმაც ნახევარ ბოთლ რაღაცაზე გაცვალა იქ მყოფი ადამიანების სიმშვიდე”, – განაცხადა ზუკა ბერძენიშვილმა “ტვ პირველთან”.
როგორც ნეტგაზეთს შინაგან საქმეთა სამინისტროში განუცხადეს, მომხდარზე გამოძიება სისხლის სამართლის კოდექსის 187-ე მუხლით დაიწყო, რაც სხვისი ნივთის დაზიანებას ან განადგურებას გულისხმობს.
