ახალი ამბები

ევროკავშირი ბელარუსს 3-მილიარდიან საინვესტიციო პაკეტს უყინავს

25 მაისი, 2021 • 1218
ევროკავშირი ბელარუსს 3-მილიარდიან საინვესტიციო პაკეტს უყინავს

ევროკავშირი ყინავს ბელარუსისთვის განკუთვნილ 3-მილიარდიან საინვესტიციო პაკეტს, მანამ  „სანამ ბელარუსი არ გახდება დემოკრატიული,“.

ამის შესახებ ევროკომისიის პრეზიდენტმა, ურსულა ფონ დერ ლაიენმა განაცხადა.

„ლუკაშენკომ და მისმა რეჟიმმა უნდა გაათვითცნობიერონ, რომ ამას მძიმე შედეგი ექნება“, – თქვა მან.

მისივე ინფორმაციით, განიხილება სხვადასხვა სანქციების დაწესებაც, როგორც ინდივიდუალურად, ასევე ბიზნესსა და სხვა ეკონომიკურ დაწესებულებებზე – „რომლებიც აფინანსებენ ამ რეჟიმს“.

„რომან პროტასევიჩი დაუყოვნებლივ უნდა გათავისუფლდეს და ჩვენ მანამდე გვექნება წნეხი რეჟიმზე, სანამ ის პატივს არ სცემს მედიის, პრესისა და აზრის თავისუფლებას.

ასევე, არსებობს 3-მილიარდიანი საინვესტიციო და ეკონომიკური პაკეტი, რომელიც შეჩერდება და გაიყინება სანამ ბელარუსი არ გახდება დემოკრატიული“, – აცხადებს ურსულა ფონ დერ ლაიენი.


23 მაისს ავიაკომპანია Ryanair-ის თვითმფრინავი, რომელიც ათენიდან ვილნიუსისკენ მიფრინავდა, ბელარუსის საჰაერო სივრცეში სამხედრო ავიაგამანადგურებლებმა აიძულეს, ბელარუსის აეროპორტში დაშვებულიყო. ამ დროს ბორტზე იმყოფებოდა ბელარუსიდან დევნილი ჟურნალისტი, ტელეგრამ-არხ Nexta-ს ყოფილი მთავარი რედაქტორი რომან პროტასევიჩი.

ბელარუსელმა მილიციელებმა ჟურნალისტი აეროპორტშივე დააკავეს, სხვა მგზავრებს კი ვილნიუსისკენ გაფრენის საშუალება მოგვიანებით მისცეს.

ბორტზე მყოფი ოპოზიციონერი ჟურნალისტის დასაკავებლად ათენი-ვილნიუსის რეისი მინსკში დასვეს

მასალების გადაბეჭდვის წესი