ნეტგაზეთი | ოქტომბრისთვის ლიეტუვა საქართველოს ასტრაზენეკას 15 000 ვაქცინას გადმოსცემს ოქტომბრისთვის ლიეტუვა საქართველოს ასტრაზენეკას 15 000 ვაქცინას გადმოსცემს – Netgazeti
RU | GE  

ოქტომბრისთვის ლიეტუვა საქართველოს ასტრაზენეკას 15 000 ვაქცინას გადმოსცემს

ლიეტუვა აღმოსავლეთ პარტნიორობის ქვეყნებს 200 000 ვაქცინას გაუზიარებს, მათ შორის, 100 000 ვაქცინას მიიღებს უკრაინა, 15 000-ს — საქართველო, 11 000-ს კი— მოლდოვა.

ამის შესახებ „ტვიტერზე“ ლიეტუვის საგარეო საქმეთა მინისტრი გაბრიელიუს ლანდსბერგისი წერს. „ეს არის პატარა ნაბიჯი ლიეტუვიდან. ვიმედოვნებთ, ჩვენი პარტნიორები ევროპაში შეუერთდებიან სოლიდარობას“, — აცხადებს ლანდგსბერგისი.

განახლება: მოგვიანებით ლიეტუვის პრემიერ-მინისტრმა ინგრიდა სიმონიტემ ტვიტერზე დაწერა, რომ ლიეტუვა აღნიშნულ ქვეყნებს ვაქცინებს 2021 წლის ოქტომბრისთვის გადასცემს. მისი განცხადებითვე, საუბარია„ვაქსზევრიას“, ანუ ასტრაზენეკას ვაქცინებზე.

ევროკავშირის წევრი სახელმიწფოების დედაქალაქები ნერგავენ შედარებით ღარიბი ქვეყნებისთვის ვაქცინების გაზიარების პრაქტიკას. მაგალითად, ავსტრია კოორდინაციას უწევს, რომ „ფაიზერის“ ვაქცინის 650 000 დოზა აგვისტოსთვის მიიღონ ბოსნია-ჰერცოგოვინამ, ალბანეთმა, ჩრდილოეთ მაკედონიამ, კოსოვომ, მონტენეგრომ და სერბეთმა. თავად ევროკომისიას არ აქვს არცერთი ცალი ვაქცინა. აპრილის ბოლოს საფრანგეთმა 105 000 დოზა ვაქცინა გადასცა მავრიტანიას, ივნისის შუა რიცხვებისთვის ეს რაოდენობა ნახევარ მილიონამდე უნდა გაიზარდოს. იგივე გეგმები აქვთ ესპანეთს, პორტუგალიას, შვედეთსა და დანიას. ევროკომისიის პრეზიდენტმა შეაქო რუმინეთი, რომელიც მოლდოვას ეხმარება.

გერმანული გამოცემა Süddeutsche Zeitung-ის ცნობით, პოლონეთი ემზადება, თავის თავზე აიღოს აღმოსავლეთ პარტნიორობის ქვეყნებისთვის ვაქცინების მიწოდების კოორდინაცია.


მასალა პრემიერ-მინისტრის გავრცელებული დამატებითი ინფორმაციით განახლდა. 

პოლონეთი აპირებს საქართველოსთვის ვაქცინების მიწოდების კოორდინირებას — Süddeutsche Zeitung

ნეტგაზეთის მასალების სხვა გამოცემებში გადაბეჭდვის წესი
ავტორი
ნინო ჩიჩუა არის "ნეტგაზეთის" რეპორტიორი 2018 წლის სექტემბრიდან.