ახალი ამბები

“დასამატებელია დოკუმენტაცია” – WHO “სინოფარმის” ვაქცინის ავტორიზაციაზე და ვაქცინაცია საქართველოში

4 მაისი, 2021 • 1104
“დასამატებელია დოკუმენტაცია” – WHO “სინოფარმის” ვაქცინის ავტორიზაციაზე და ვაქცინაცია საქართველოში

“დასამატებელია დოკუმენტაცია” – ასე უპასუხეს 3 მაისს ჯანდაცვის მსოფლიო ორგანიზაციაში დასმულ კითხვაზე, რომელიც კოვიდ 19 -ის ჩინური ვაქცინის, “სინოფარმის” ავტორიზაციას შეეხებოდა.

WHO-ს გენერალური დირექტორის თანაშემწე მარიანჯელა სიმაოს არ დაუკონკრეტებია, რა დოკუმენტების დამატებაზეა საუბარი, თუმცა ქართველი ჟურნალისტის კითხვის საპასუხოდ დასძინა, რომ “სინოფარმთან” დაკავშირებით ჯანმო გადაწყვეტილებას ამ კვირის ბოლომდე გამოაქვეყნებს.

ამ განცხადებამდე გამოქვეყნდა WHO-ს ექსპერტების რეკომენდაცია ვაქცინასთან დაკავშირებით. Sinopharm/BBIBP -ს დოკუმენტაცია მსოფლიო ჯანდაცვის ორგანიზაციაში 29 აპრილს დახურულ შეხვედრაზე განიხილეს, ექსპერტების შეფასება კი ახლა გახდა ცნობილი.

რა წერია ექპერტების რეკომენდაციებში – მოკლედ

ამ დოკუმენტის მიხედვით, სხვადასხვა ქვეყნაში მესამე ფაზის კლინიკური კვლევის მონაცემებით Sinopharm/BBIBP-ის ეფექტიანობა 78.1 %-ია 18-59 ასაკობრივ ჯგუფში.

ექსპერტთა ჯგუფი:

[checklist]

  • დარწმუნებულია, რომ BBIBP-CorV– ის ორი დოზა ეფექტიანია მოზრდილებში (18-59 ასაკობრივ ჯგუფში) COVID– 19 პრევენციის თვალსაზრისით.
  • ზომიერად დარწმუნებულია, რომ მოზრდილებში (18-59 ასაკობრივ ჯგუფში) სერიოზული გვერდითი მოვლენების რისკი BBIBP-CorV-ის ერთი ან ორი დოზის დროს დაბალია.
  • არაა დარწმუნებული, რომ ვაქცინა ეფექტურია კორონავირუსის პრევენციისთვის 60 და ზემოთ ასაკის მოქალაქეებში.
  • არ ენდობა მტკიცებულებებს, რომ ვაქცინის ორი დოზა ეფექტურია PCR– ით დადასტურებული COVID-19 პრევენციისთვის თანმხლები დაავადებების მქონე პაციენტებში.

[/checklist]

თუმცა უფრო მეტი დეტალი მას შემდეგ გახდება ცნობილი, რაც ჯანმო დასკვნას გამოაქვეყნებს ვაქცინაზე – დადებითს ან უარყოფითს.

ასევე ნახეთ: ყველაფერი, რაც ამ დრომდე ვიცით “სინოფარმის” ვაქცინაზე

საქართველო არ ელოდება ჯანმოს ავტორიზაციას

დღეს, 4 მაისს საქართველო კოვიდ 19-ის ჩინური “სინოფარმით” იწყებს მოქალაქეების კოვიდ 19 -ზე ვაქცინაციას, იმის მიუხედავად, რომ ვაქცინას მსოფლიო ჯანდაცვის ორგანიზაციის ავტორიზაცია ჯერ არ მიუღია.

ერთ-ერთი პირველი, ვინც საქართველოში ამ ვაქცინით აიცრება, დაავადებათა კონტროლის ეროვნული ცენტრის ხელმძღვანელია. ამირან გამყრელიძე, რომელსაც კორონავირუსი დეკემბერში დაუდასტურდა, “სინოფარმით” 9.30 საათზე აიცრება. 10.00 საათიდან კი ვაქცინაციის ცენტრები მზად იქნება ვაქცინაზე რეგისტრირებული მოქალაქეებისთვის.

საქართველომ ჩინეთისგან COVID-19-ის საწინააღმდეგო ვაქცინა „სინოფარმის“ 100 000 დოზა აპრილის დასაწყისში შეიძინა.  ვაქცინაციამდე მთავრობას მოლოდინი ჰქონდა, რომ WHO პოზიტიურ დასკვნას გამოაქვეყნებდა, რაც ჯერჯერობით არ გამართლდა. თუმცა ჯანდაცვის მინისტრმა ეკატერინე ტიკარაძემ 29 აპრილს ცვლილება შეიტანა ბრძანებაში, რომელიც ,,COVID-19-ის საწინააღმდეგო ვაქცინის დანერგვისა და იმუნიზაციის მართვის წესის დამტკიცებას“ შეეხება. ცვლილების შედეგად საქართველოში ნებადართულ ფაიზერის და ასტრაზენეკას ვაქცინებს დაემატა “ COVID – 19 – ის საწინააღმდეგო ვაქცინა (Vero Cell), ინაქტივირებული”,  რაც იგივე სინოფარმის ვაქცინაა.

მოქალაქეების რეგისტრაცია სინოფარმით ვაქცინაზიაზე საქართველოში 27 აპრილს დაიწყო.

ასევე ნახეთ: რა ვიცით ჩინეთში წარმოებული ვაქცინების უსაფრთხოებასა და ეფექტიანობაზე

მასალების გადაბეჭდვის წესი