ნეტგაზეთი | გიორგი მუმლაძემ გირაოს გადახდის შემდეგ საპატიმრო დატოვა გიორგი მუმლაძემ გირაოს გადახდის შემდეგ საპატიმრო დატოვა – Netgazeti
RU | GE  

გიორგი მუმლაძემ გირაოს გადახდის შემდეგ საპატიმრო დატოვა

აქტივისტმა გიორგი მუმლაძემ სამიათასლარიანი გირაოს გადახდის შემდეგ საპატიმრო დღეს, 16 აპრილს, საღამოს დატოვა.

მუმლაძე 14 აპრილს სისხლის სამართლის კოდექსით გათვალისწინებული დანაშაულისთვის, პოლიციისთვის წინააღმდეგობის გაწევის ბრალდებით, დააკავეს. დამტკიცების შემთხვევაში, ბრალდება 2-დან 5 წლამდე ვადით თავისუფლების აღკვეთას ითვალისწინებს.

გამოძიების ვერსიით, “ქართული ოცნების” ოფისთან 14 აპრილს გამართულ აქციაზე მუმლაძემ პოლიციის თანამშრომლებს სამსახურებრივი მოვალეობის შესრულებისას წინააღმდეგობა გაუწია და ფიზიკური შეურაცხყოფა მიაყენა.

თბილისის საქალაქო სასამართლომ დღეს იმსჯელა მუმლაძისთვის აღკვეთის ღონისძიების შეფარდებაზე და მას სამიათასლარიანი გირაო შეუფარდა.

მოძრაობამ “საქართველოსთვის” ფეისბუკზე გამოაქვეყნა პოსტი და მოქალაქეებს მუმლაძის მხარდასაჭერად ფულის შეგროვებისკენ მოუწოდა. ორგანიზაციის წარმომადგენლის, ალიკა კუპრავას ინფორმაციით, გირაოსთვის საჭირო თანხა მალევე შეგროვდა, ფული გადაიხადეს და დაკავებულმა საპატიმრო დატოვა.

ციხიდან გამოსულმა მუმლაძემ ჟურნალისტებს უთხრა, რომ დაკავება მის მიმართ პოლიტიკური დევნის გაგრძელებაა.

ფოტოზე: გათავისუფლებული მუმლაძე (შუაში) მეგობრებთან ერთად. ავტორი: ლაშა ხუსკივაძე/ფეისბუკი

ნეტგაზეთის მასალების სხვა გამოცემებში გადაბეჭდვის წესი
ავტორი
თაზო კუპრეიშვილი არის "ნეტგაზეთის" რედაქტორი 2018 წლის პირველი თებერვლიდან.