საქართველოს პრეზიდენტის, სალომე ზურაბიშვილის განცხადებით, სკოლებში ორი ქართველური ენა – მეგრული და სვანური არჩევით უნდა ისწავლებოდეს.
მან ეს განცხადება დედაენის დღისადმი მიძღვნილი მიმართვის ტექსტით გაავრცელა.
“ვჩაგრავთ ჩვენი ენის ფუძე ენებს – მეგრულსა და სვანურს. რატომღაც გვეშინია, ქართულის უმდიდრეს ლიტერატურულ ენად ჩამოყალიბებაში მათი როლის აღიარება.
მეგრულიც და სვანურიც ჩვენი საგანძურია, რომელსაც უნდა ვიცავდეთ და ვანიჭებდეთ სწორ ადგილს. ყველა მსურველს უნდა ჰქონდეს სკოლაში ამ ენების არჩევით შესწავლის საშუალება და არ უნდა ვემორჩილებოდეთ ცრუ შიშებს!”, – ნათქვამია პრეზიდენტის მიერ გავრცელებულ მიმართვაში.
ქართველი ეთნოლოგებისა და ისტორიკოსების ნაწილი მუდმივად ამახვილებენ ყურადღებას იმაზე, რომ მეგრულ, სვანურ და ლაზურ ენებს გაქრობის საფრთხე უდგათ.
