ნეტგაზეთი | პირადი ცხოვრების კადრების საქმეზე ბესელიას ინტერესებს საია დაიცავს პირადი ცხოვრების კადრების საქმეზე ბესელიას ინტერესებს საია დაიცავს – Netgazeti
Batumelebi | RU

პირადი ცხოვრების კადრების საქმეზე ბესელიას ინტერესებს საია დაიცავს

საქართველოს ახალგაზრდა იურისტთა ასოციაცია პირადი ცხოვრების ამსახველი კადრების საქმეზე ეკა ბესელიას ინტერესებს დაიცავს.

ორგანიზაციაში აცხადებენ, რომ პირადი ცხოვრების ამსახველი კადრებით შანტაჟი, განსაკუთრებით ბოლო წლების განმავლობაში, მნიშვნელოვან იარაღად იქცა, რომელსაც ხელისუფლება თუ არაფორმალურად დაინტერესებული სუბიექტები აქტიურად იყენებენ კონკრეტული პირების საჯარო თუ პოლიტიკური ცხოვრებიდან განდევნის მიზნით.

საიას შეფასებით, შემაშფოთებელია ის ფაქტი, რომ საქართველოს ხელისუფლება მიზანმიმართულად არიდებს თავს ამგვარი დანაშაულების დროულ და ეფექტიან გამოძიებას, რითიც ადასტურებს იმას, რომ არ აქვს პოლიტიკური ნება, აღიკვეთოს ფარული ჩანაწერებით შანტაჟის პრაქტიკა.

ეკა ბესელიას საქმეზე გამოძიების დაწყებიდან დღემდე, 2 წელზე მეტი პერიოდის გასვლის შემდეგ, საიას განცხადებით, პროკურატურის მიერ პასუხისგებაში მიცემული არიან მხოლოდ ის პირები, რომლებმაც შეინახეს ან/და გაუზიარეს სხვა პირებს აღნიშნული ჩანაწერი, ხოლო ის პირები, რომლებიც პირდაპირ მონაწილეობდნენ აღნიშნული ჩანაწერის შექმნაში და ამ ჩანაწერის გავრცელების პირველწყაროს წარმოადგენენ, დღემდე არ არიან იდენტიფიცირებულნი.

2021 წლის პირველ აპრილს საია ეკა ბესელიას საქმეში ჩაერთო, როგორც დაზარალებულის ინტერესების დამცველი ორგანიზაცია.

საია მოუწოდებს საგამოძიებო ორგანოებს, გამოძიების პროცესი მიმართონ იმ პირების გამოვლენასა და პასუხისგებაში მიცემაზე, რომლებიც უშუალოდ ჩართულნი იყვნენ ეკა ბესელიას პირადი ცხოვრების საიდუმლოების ამსახველი კადრების შექმნასა და პირველად გავრცელებაში.

ორგანიზაციაში მიიჩნევენ, რომ კრიტიკულად აუცილებელია, დაისაჯოს პირველწყარო და ხელისუფლებამ დაადასტუროს, რომ არ აფარებს / უწყობს ხელს ამგვარ შემაშფოთებელ დანაშაულებს. წინააღმდეგ შემთხვევაში, ორგანიზაციის განცხადებით, დაუსჯელობის სინდრომს, ერთი მხრივ, წამახალისებელი ეფექტი აქვს დანაშაულის განმეორებითობაზე, ხოლო, მეორე მხრივ, იწვევს დაზარალებულის მუდმივ მორალურ სტრესში ყოფნას. ამავდროულად, მსუსხავი ეფექტი აქვს იმ ადამიანების გამოხატვის თავისუფლებაზე, რომლებიც, შესაძლოა, იყვნენ პოლიტიკურად აქტიურები და ავრცელებდნენ ხელისუფლებისთვის არასასურველ განცხადებებს.

ამასთან, საია აღნიშნავს, რომ კამპანია „ეს შენ გეხება, ისევ გვისმენენ” 2014 წლიდან ცდილობს ფარული მიყურადების მომწესრიგებელი კანონმდებლობისა და პრაქტიკის შეცვლას და პირადი ცხოვრების ხელშეუხებლობის კონსტიტუციური გარანტიის დაცვას:

“სამწუხაროდ, 2012 წლის საპარლამენტო არჩევნების შემდეგ ხელისუფლებაში მოსულ მმართველ კოალიციას ამ მიმართულებით არანაირი სისტემური ცვლილება არ განუხორციელებია. დაპირების მიუხედავად, საქართველოს ოპერატიულ-ტექნიკური სააგენტოს კვლავ აქვს შეუზღუდავი წვდომა კავშირგაბმულობის ოპერატორთა მონაცემებთან და მოქალაქეთა შორის ყველა სახის კომუნიკაციასთან.

ფარული ჩანაწერების გავრცელებაზე დამნაშავე პირების დაუსჯელობა და უცვლელი საკანონმდებლო ბაზა გვაძლევს საფუძველს ვივარაუდოთ, რომ საქართველოს ხელისუფლებას არ გააჩნია არანაირი სურვილი, ქვეყანაში მოქალაქის პირადი ცხოვრების ხელშეუხებლობა დაცული იყოს”, – აცხადებენ ორგანიზაციაში.

ნეტგაზეთის მასალების სხვა გამოცემებში გადაბეჭდვის წესი
ავტორი
მარიამ ბოგვერაძე არის "ნეტგაზეთის" რეპორტიორი 2016 წლიდან.