ახალი ამბები |

14 წლის გოგოს ამბავი უმწვავეს სისტემურ პრობლემებს უჩვენებს – სოცმუშაკთა გაერთიანება

11 თებერვალი, 2021 | | 377
14 წლის გოგოს ამბავი უმწვავეს სისტემურ პრობლემებს უჩვენებს – სოცმუშაკთა გაერთიანება

დამოუკიდებელი პროფკავშირი „სოციალურ მუშაკთა გაერთიანება“ აცხადებს, რომ ქობულეთში 14 წლის გოგოს სავარაუდო თვითმკვლელობის ამბავი სახელმწიფოს ბავშვთა დაცვის სისტემაში არსებულ უმწვავეს პრობლემებს აჩვენებს.

ქობულეთში სექსუალური ძალადობის ბრალდებით 23 წლის კაცი შსს-მ მას შემდეგ დააკავა, რაც დაზარალებულმა 14 წლის გოგომ, სავარაუდოდ, თავი მოიკლა. მისი გარდაცვალების შესახებ გუშინ გავრცელდა ინფორმაცია.

გარდაცვლილის ბაბუა 10 თებერვალს ჟურნალისტებთან ამბობდა, რომ სექსუალური ძალადობის შესახებ ოჯახმა ორი თვის წინ გაიგო, შემთხვევა კი გასულ ზაფხულს მოხდა.

სოფლის სკოლის დირექტორის ინფორმაციით, გოგოსთან სოცმუშაკი მუშაობდა და ბოლო ვიზიტი 4 თებერვალს ჰქონდა. სახელმწიფო ზრუნვის სააგენტოდან კი „ბათუმელებს“ მოსწერეს, რომ ბავშვთან ფსიქოლოგი არ მუშაობდა.

„სოციალურ მუშაკთა გაერთანების“ შეფასებით, ეს ამბავი „კიდევ ერთხელ გვახსენებს ჩვენი ქვეყნის ბავშვთა დაცვის სისტემაში არსებულ უმწვავეს პრობლემებს“.

მათი თქმით, იმის მიუხედავად, რომ არასრულწლოვანთან სხვადასხვა სახელმწიფო უწყება მუშაობდა, ვერც ერთმა მათგანმა შეძლო სათანადოდ ბავშვის დაცვა შესაძლო რისკებისგან: „არასრულწლოვანმა ვერ მიიღო ადეკვატური და სათანადო მხარდაჭერის სერვისები, რამაც სავალალო მდგომარეობამდე მიიყვანა იგი“.

„ხაზგასასმელია, რომ ქვეყანაში არ ხდება „სოციალური მუშობის შესახებ“ კანონის დროულად და ეფექტიანად აღსრულება, რაც მნიშვნელოვნად გააუმჯობესებდა სოციალური დაცვს სისტემის უმნიშვნელოვანესი რგოლის, სოციალური მუშაკის ინსტიტუტს და დაიცავდა არასრულწლოვნებს ძალადობისა თუ სხვა რისკებისგან. კერძოდ,

  •  ამ დრომდე არ არსებობს გადაუდებელ შემთხვევებზე 24 -საათიანი რეაგირების მექანიზმი, რაც გულისხმობს იმას, რომ სოციალურ მუშაკს არ გააჩნია კრიზისულ სიტუაციაში სამოქმედო გაიდლაინი და არ ჰყავს სატრანსპორტო საშუალება გადასაადგილებლად.
  • ამ დრომდე სახელმწიფო ზრუნვის სააგენტოში დასაქმებულია 50-ით ნაკლები სოციალური მუშაკი, მიუხედავად კანონის მითითებისა, რაც იწვევს ერთ სოციალურ მუშაკზე საქმეთა გადაჭარბებულ რაოდენობას, რაც საშუალოდ გულისხმობს თვეში 100-დან 200 შემთხვევაზე მუშაობას.
  • სისტემაში არსებობს ფსიქოლოგის კადრის კრიტიკული დეფიციტი. ბენეფიციარებს ხშირად რამდენიმე თვიდან ერთ წლამდე უწევთ მომსახურების მიღების ლოდინი.
  • მნიშვნელოვან გამოწვევად რჩება სამართალდამცავი ორგანოების მხრიდან სექსუალურ ძალადობებზე დროული და ადეკვატური რეაგირება. სექსუალური ძალადობის მსხვერპლენი ხვდებიან არადაპტირებულ გარემოში სათანადო ფსიქო-სოციალური მომსახურებების გარეშე.

აღნიშნული შემთხვევა კიდევ ერთხელ აჩვენებს, რომ უწყებების მხრიდან არ ხდება ბავშვთა დაცვის მიმართვიანობის (რეფერირების) პროცედურების განსახორციელებლად კოორდინირებული მუშაობა.

არსებულ ეკონომიკურ და პატრიარქალურ სისტემაში განსაკუთრებით საყურადღებოა ქალთა და გოგონათა დაცვა ძალადობისგან და მათი მხარდაჭერა. გენდერული ნიშნით სპეციფიკას უნდა ითვალისწინებდეს არასრულწლოვანთან მომუშავე ყველა რგოლი“, – წერია ორგანიზაციის განცხადებაში.

ნახეთ ასევე:

პოლიციამ რამდენიმე თვე არაფერი გააკეთა – ადვოკატი 14 წლის გოგოს შესაძლო გაუპატიურებაზე

მასალების გადაბეჭდვის წესი