ნეტგაზეთი | უმრავლესობას მოვუწოდებ, არ მიიღოს მანდატების შეწყვეტის ნაადრევი გადაწყვეტილება — ზურაბიშვილი უმრავლესობას მოვუწოდებ, არ მიიღოს მანდატების შეწყვეტის ნაადრევი გადაწყვეტილება — ზურაბიშვილი – Netgazeti
RU | GE  

უმრავლესობას მოვუწოდებ, არ მიიღოს მანდატების შეწყვეტის ნაადრევი გადაწყვეტილება — ზურაბიშვილი

საქართველოს პრეზიდენტი სალომე ზურაბიშვილი პარლამენტში ოპოზიციის წარმომადგენლებისთვის სადეპუტატო უფლებამოსილების შეწყვეტასთან დაკავშირებით კენჭისყრამდე ოპოზიციასა და უმრავლესობას მიმართავს.

ზურაბიშვილი ოპოზიციას დაფიქრებისკენ, “ქართულ ოცნებას” კი ნაადრევი გადაწყვეტილების მიღებისგან თავშეკავებისკენ მოუწოდებს.

როგორც ზურაბიშვილი ამბობს, როგორც ქვეყნის შიგნით, ისე საერთაშორისო დონეზე ერთიანობისა და სოლიდარობის დრო დგება. მისი თქმით,  პანდემიისგან წარმოქმნილი კრიზისი ეფექტიან და სწრაფადმოქმედ პარლამენტსა და ყველასგან საქმიან მიდგომას მოითხოვს. ზურაბიშვილი ამბობს, რომ პოლიტიკური დაპირისპირება ამ რთულ გამოწვევებს ვერ პასუხობს.

“მინდა, დღეს ორივე მხარეს მოვუწოდო გონივრული გადაწყვეტილებისკენ, რომელიც ქვეყნის სასიკეთოდ გადადგმული ნაბიჯი იქნება და არა ვიწრო ინტერესებზე გათვლილი. ოპოზიციას, რათა დაფიქრდეს, პატივი სცეს ამომრჩეველს და მათი მანდატით მიცემული დავალება შეასრულოს; უმრავლესობას, რათა არ მიეცეს ერთპარტიული მართვის ცდუნებას, არ მიიღოს მანდატების შეწყვეტის ნაადრევი გადაწყვეტილება და მისცეს დრო ოპოზიციას სწორი გადაწყვეტილების მისაღებად. ეს არის ჩვენი საზოგადოების მოთხოვნა და მოლოდინი”, — განაცხადა ზურაბიშვილმა.

ხვალ პარლამენტში კენჭს უყრიან ოპოზიციური პარტიებიდან არჩეული 51 პარლამენტარის წევრის უფლებამოსილების შეწყვეტის საკითხს.
31 ოქტომბრის საპარლამენტო არჩევნებში ბარიერგადალახული ოპოზიციური პარტიების 55-მა წევრმა საპარლამენტო მანდატების გაუქმების შესახებ განცხადებები დაწერა. მანდატების გაუქმებაზე გაცნხადება არ დაუწერია “გირჩის” სამ წევრს: იაგო ხვიჩიას, ვახტანგ მეგრელიშვილსა და ალექსანდრე რაქვიაშვილს, ასევე, პარტია “მოქალაქეების” წევრებს.
პარლამენტმა ოთხ დეპუტატს “პატრიოტთა ალიანსიდან” უკვე შეუწყდა სადეპუტატო უფლებამოსილება და მათ ნაცვლად პარლამენტში პარტიის საარჩევნო სიის 4 წევრი შევიდა. 29 იანავრს კი ცნობილი გახდა, რომ პარლამენტში პარტია “მოქალაქეების” წევრები — ალეკო ელისაშვილი და ლევან იოსელიანიც შევლენ.
ნეტგაზეთის მასალების სხვა გამოცემებში გადაბეჭდვის წესი
ავტორი