ახალი ამბებისამხრეთ კავკასიის ამბები

რუსეთი ვერ იმოქმედებს ყარაბაღში ისე, როგორც აფხაზეთსა და სამხრეთ ოსეთში| თომას დე ვაალი

1 თებერვალი, 2021 • 804
რუსეთი ვერ იმოქმედებს ყარაბაღში ისე, როგორც აფხაზეთსა და სამხრეთ ოსეთში| თომას დე ვაალი

Carnegie Europe-ს კვლევითი ცენტრის მკვლევარი და ექსპერტი კავკასიის საკითხებში თომას დე ვაალი რადიო თავისუფლების სომხეთის სამსახურთან ინტერვიუში მთიანი ყარაბაღის კონფლიქტსა და რუსეთის როლის შესახებ საუბრობს.

“რუსეთს საკუთარი დღის წესრიგი აქვს. მას სურს, სამშვიდობო შეთანხმებამ იმუშაოს. თუმცა კიდევ ბევრი გადაუჭრელი საკითხი არსებობს, მაგალითად, ტყვეების საკითხი. რაც შეეხება აზერბაიჯანულ მხარეს, ვფიქრობ, ისინი ნაკლებად კმაყოფლი არიან იმით, რომ რუსეთის სამშვიდობო მისიას არ აქვს მკაფიო მანდატი და რუსეთს შეუძლია ცალმხრივ რეჟიმში ნაბიჯების გადადგმა.

ამასთან, რუსეთი ვერ უგულებელყოფს ფაქტს, რომ არსებობს მისი მისიის ხუთწლიანი ვადა, რომელიც შესაძლოა, ავტომატურად არც გაგრძელდეს, თუკი ამის წინააღმდეგი იქნებიან ბაქოსა ან ერევანში. ასე რომ, რუსეთი ვერ იმოქმედებს ყარაბაღში ისე, როგორც აფხაზეთსა და სამხრეთ ოსეთში. მას უწევს ბაქოს ინტერესების გათვალისწინება.

მეორე მხრივ, როგორც ექსპერტი მიიჩნევს, რუსეთს გამართლება სჭირდება  იმისთვის, რომ ყარაბაღში საკუთარი სამშვიდობო მისია ჰყავდეს, წინააღმდეგ შემთხვევაში, სრული მშვიდობის დამყარების შემდეგ, მისი როლი დაიკარგება.

“რუსეთი მუდმივად ბალანსს მიმართავს. მას დიდი გავლენა აქვს, თუმცა ეს ძალიან რთული თამაშია. ეუთოს მინსკის ჯგუფის ფარგლებში რუსეთს სურს კონფლიქტზე პასუხისმგებლობის გაყოფა საფრანგეთთან და აშშ-თან. ასევე, ვფიქრობ, რომ თავად ბაქოსაც და ერევანსაც არ სურთ, რომ რუსეთს ჰქონდეს მონოპოლია კონფლიქტზე”.

მისივე აზრით, აშშ-ს და ევროკავშირს შეუძლია რიგ საკითხებში, მათ შორის პოლიტიკურ და რეგიონის ეკონომიკურ საკითხებზე, საუბარი და მხარდაჭერა, თუმცა ამ ეტაპზე ბევრად ჩამორჩნენ კონფლიქტის დარეგულირების პროცესს, რუსეთისგან განსხვავებით.

რუსეთი შუამავლობით ხელმოწერილი შეთანხმების დოკუმენტის მიხედვით, მთიან ყარაბაღში განთავსდა რუსული სამშვიდობო მისია, რომელიც დაახლოებით 2000-კაციანი შემადგენლობითაა წარმოდგენილი. რუსული მხარე აკონტროლებს ლაჩინის კორიდორსაც, რომელიც სომხეთს დე ფაქტო მთიან ყარაბაღთან აკავშირებს. სწორედ ისინი არიან ჩართული სომხეთ-აზერბაიჯანის სახელმწიფო საზღვრის დემარკაციის პროცესშიც.

 

 

მასალების გადაბეჭდვის წესი