ნეტგაზეთი | “დაგვიანებული ხომ არ არის?” — ზარქუა კოვიდვაქცინასთან დაკავშირებულ საკანონმდებლო ცვლილებაზე “დაგვიანებული ხომ არ არის?” — ზარქუა კოვიდვაქცინასთან დაკავშირებულ საკანონმდებლო ცვლილებაზე – Netgazeti
RU | GE  

“დაგვიანებული ხომ არ არის?” — ზარქუა კოვიდვაქცინასთან დაკავშირებულ საკანონმდებლო ცვლილებაზე

საპარლამენტო უმრავლესობის წევრი ირაკლი ზარქუა დაინტერესდა, საქართველომ ხომ არ დააგვინა კორონავირუსის ვაქცინასთან დაკავშირებით საკანონმდებლო რეგულაციების მიღება.

ამის შესახებ მან ჯანდაცვის კომიტეტის თავმჯდომარეს, დიმიტრი ხუნდაძეს პარლამენტის რიგგარეშე სესიის პლენარული სხდომაზე ჰკითხა, სადაც საზოგადოებრივი ჯანმრთელობის შესახებ საქართველოს კანონში შესატანი ცვლილებების პროექტის პირველი მოსმენა გაიმართა, რომელიც ეხება კოვიდ 19-ის ვაქცინით საქართველოს უზრუნველყოფის საკითხს.

“ჩვენც ვიცით, რომ ბევრ ქვეყანაში უკვე ვაქცინაციის რამდენიმე ეტაპს გადიან. ჩვენთან დაგვიანებული ხომ არ არის ეს? ცოტა ადრე რატომ არ იყო ეს ინიციატივა და რეგულაცია, თუ ამას ითხოვდა?” — იკითხა ირაკლი ზარქუამ.

ხუნდაძემ ზარქუას უპასუხა, რომ დაგვიანებული არაფერია. მისი თქმით, სხვადასხვა ქვეყანას სხვადასხვა შესაძლებლობები აქვს, ქვეყნების ნაწილი კი თავად აწარმოებს ვაქცინას და მათთვის განსხვავებულია ხელმისაწვდომობაც.

“მნიშვნელოვანია, რომ ქვეყანაში შემოვა ვაქცინა, რომელსაც საერთაშორისო აღიარება აქვს და ეს ჩვენი უცვლელი პირობაა, რომ მოსახლეობას მივაწვდით მხოლოდ ჯანდაცვის მსოფლიო ორგანიზაციის ავტორიზაციით ნებადართულ ვაქცინას”, — განაცხადა ხუნდაძემ.

მისივე თქმით, თვის ბოლოს გახდება ცნობილი გრაფიკი, თუ რომელი ქვეყანა რა თანმიმდევრობით და რა ოდენობით მიიღებს კორონავირუსის ვაქცინას.

საქართველოს პარლამენტმა 81 ხმით, პირველი მოსმენით მიიღო კანონპროექტი, რომელიც კოვიდის აცრის შესაძლო ზიანზე პასუხისმგებლობას განსაზღვრავს. კანონპროექტით, „საზოგადოებრივი ჯანმრთელობის შესახებ“ კანონს გარდამავალი რეგულირების სახით ემატება COVID-19 საწინააღმდეგო ფარმაცევტული პროდუქტთან დაკავშირებული პასუხისმგებლობის დროებითი წესი, რომლის მიხედვითაც, “COVID-19-ის საწინააღმდეგო პროფილაქტიკური აცრისთვის ან მკურნალობისთვის განკუთვნილი ფარმაცევტული პროდუქტის შემოტანისას, როდესაც ფარმაცევტულ პროდუქტს ჯანმრთელობის მსოფლიო ორგანიზაციის ან მის მიერ აღიარებული მკაცრი მარეგულირებელი ორგანოების (SRAs) მხრიდან მინიჭებული აქვს გამოყენების (მათ შორის გადაუდებელი გამოყენების) ავტორიზაცია ან პრეკვალიფიკაცია, ამ ფარმაცევტული პროდუქტის გამოყენების შედეგად შესაძლო ზიანზე პასუხისმგებელია სახელმწიფო, გარდა იმ შემთხვევისა, როდესაც ზიანზე პასუხისმგებლობა ეკისრება იმპორტიორს, სამედიცინო პერსონალს, სამედიცინო დაწესებულებას, თუ ზიანი გამოწვეულია იმპორტიორის მიერ დაშვებული შეცდომით, პროდუქტის მწარმოებელს, მწარმოებელთან გაფორმებული ხელშეკრულების შესაბამისად.

ნეტგაზეთის მასალების სხვა გამოცემებში გადაბეჭდვის წესი
ავტორი