შინაგან საქმეთა სამინისტროს ცნობით, დააკავეს პირი, რომელმაც სხვისი “ტოიოტა პრიუსი” დაშალა და ნაწილებად გაყიდა.
როგორც შსს აცხადებს, გამოძიებით დადგინდა, რომ 1991 წელს დაბადებულმა გ.რ-მ მიმდინარე წლის 25 ოქტომბერს, სიტყვიერი შეთანხმების საფუძველზე, თავისი კუთვნილი, „ტოიოტა პრიუსის“ მოდელის ავტომობილი ბრალდებულ ვ.მ-ს და 1987 წელს დაბადებულ ტ.ბ-ს გადასცა, რის შემდეგაც აღნიშნულმა პირებმა ავტომობილს სხვადასხვა დეტალი მოხსნეს და გაასხვისეს.
პოლიციამ ვ.მ. მიმდინარე წლის 4 იანვარს დააკავა. 1987 წელს დაბადებული ტ.ბ. კი სამართალდამცველებმა ამავე საქმეზე 2020 წლის 20 ნოემბერს თბილისში დააკავეს.
დაშლილი ავტომობილი პოლიციამ თბილისში, ყვარლის ქუჩაზე იპოვა და ნივთმტკიცების სახით ამოიღო.
შსს-ს ცნობით, მიმდინარე გამოძიების ფარგლებში ასევე დადგინდა, რომ ტ.ბ-სა და ვ.მ-ს ანალოგიური თაღლითური სქემით მითვისებული აქვთ სხვა მოქალაქეების კუთვნილი ავტომობილებიც, რომელთაგან გამოძიებამ იპოვა და ამოიღო 5 ავტომობილი.
დანარჩენი ავტომობილების ადგილმდებარეობის დადგენისა და ნივთმტკიცებად ამოღების მიზნით გრძელდება საგამოძიებო მოქმედებები.
გამოძიება საქართველოს სისხლის სამართლის კოდექსის 180-ე მუხლის მე-2 ნაწილის “ა” და ამავე მუხლის მე-3 ნაწილის „ბ“ ქვეპუნქტებით მიმდინარეობს, რაც ჯგუფურად, დიდი ოდენობით ჩადენილ თაღლითობს გულისხმობს. დანაშაული 6-დან 9 წლამდე პატიმრობას ითვალისწინებს.
