ახალი ამბები

ოჯახის ცნობით, მინდია ლავასოღლი ოდესაში დააკავეს

4 იანვარი, 2021 • 2408
ოჯახის ცნობით, მინდია ლავასოღლი ოდესაში დააკავეს

კანონიერი ქურდობის ბრალდებით საქართველოში გასამართლებული მინდია ლავასოღლი ამჯერად ოდესის აეროპორტში დააკავეს. ამის შესახებ ინფორმაცია უკრაინულმა მედიამ გუშინ გაავრცელა.

გუშინ საქართველოში ამ ინფორმაციის გადამოწმება შეუძლებელი აღმოჩნდა, რადგან „ბათუმელების“ სატელეფონო ზარებს არც პროკურატურაში უპასუხეს, არც შს სამინისტროში და არც ლავასოღლის ოჯახში.

დღეს, 4 იანვარს, თამაზ ბაკურიძემ „ბათუმელებს“ უთხრა, რომ ის ესაუბრა მინდია ლავასოღლის დედას, რომელმაც განუცხადა, რომ სავარაუდოდ უკრაინის მიმართულებით შვილის ექსტრადირებას ელოდნენ წინასაახალწლოდ. „ოჯახს სურს, რომ ის საქართველოში დააბრუნონ, მაგრამ ხელისუფლება ამის წინააღმდეგია, ამიტომ ოჯახს ერჩივნა, რომ ის უკრაინაში ყოფილიყო. საზღვარზე იყო მცირედი გაუგებრობა, მაგრამ ახლა ეს გაუგებრობა აღმოფხვრილია. ლავასოღლისთან მიმართებაში ახლა მიმდინარეობს შესაბამისი სამართლებრივი პროცედურები. ის დაკავებულია“, – აცხადებს უფლებადამცველი თამაზ ბაკურიძე.

მინიდია ლავასოღლის [იგივე მინდია გორაძე, მან გვარი მოგვიანებით შეიცვალა] საქართველოს ხელისუფლებას საერთაშორისო ძებნა აქვს გამოცხადებული.

მინდია ლავასოღლი თურქეთის ციხიდან მაისის თვეში გამოუშვეს იმ პირობით, რომ ის თურქეთს დატოვებდა. მან მესამე ქვეყანად ბელორუსი აირჩია. მინსკში ჩასვლისთანავე ლავასოღლი აეროპორტში დააკავეს. ამის შემდეგ საექსტრადაციო პროცედურა უნდა დაეწყო საქართველოს პროკურატურას, თუმცა, უცნობია, პროცედურა რა ეტაპზეა ან საერთოდ დაიწყო თუ არა.

ლავასოღლი თურქულ ციხეში, საექსტრადაციო პატიმრობაში 2018 წლის ბოლოს დააკავეს. ოჯახი აცხადებდა, რომ საქართველოს ხელისუფლება ექსტრადაციას ხელოვნურად აჭიანურებდა. ლავასოღლის საქართველოში ექსტრადირების მოთხოვნით, 2020 წლის ზაფხულში საპროტესტო აქციებიც იმართებოდა.

ლავასოღლი თურქეთში საქართველოდან მას შემდეგ წავიდა, რაც ის წინასწარი პატიმრობიდან მოსამართლემ გაათავისუფლა. ლავასოღლის სამი მუხლით იყო ბრალდებული, მათ შორის კანონიერ ქურდობაზეც, თუმცა წინასწარი პატიმრობის ვადაში ქართველმა სამართალდამცავებმა მას ეს ბრალი ვერ დაუდასტურეს.

მასალების გადაბეჭდვის წესი