COVID-19-ის წინაარმდეგ Pfizer-ის მიერ შექმნილ ვაქცინას ევროკავშირის სამედიცინო სააგენტომაც მიანიჭა ავტორიზაცია და მისი გამოყენების რეკომენდაცია გასცა ერთობის 27 ქვეყანაში.

როგორც BBC წერს, ევროკომისია დღის განმავლობაში პრეპარატს ფორმალურად დაამტკიცებს და მისი დისტრიბუცია ევროკავშირის წევრს ქვეყნებში შესაძლოა მიმდინარე კვირის ბოლოსვე დაიწყოს.

სააგენტოს განცხადებით, ვაქცინამ 95%-იანი ეფექტურობა გამოავლინა და მისი გამოყენება დასაშვებია მოქალაქეებში 16 წლიდან.

“დღევანდელი პოზიტიური ამბავი მნიშვნელოვანი ნაბიჯია პანდემიასთან ბრძოლის მიმართულებით”, – განაცხადა სააგენტოს აღმასრულებელმა დირექტორმა.

მისი თქმით, ვაქცინა უსაფრთხოა და ყველა სტარნდატს აკმაყოფილებს.

აღნიშნული ვაქცინა უკვე დაამტკიცა აშშ-ის საკვებისა და მედიკამენტების სააგენტომ (FDA). აშშ-ში ვაქცინის გამოყენება რისკჯგუფებში შემავალი მოქალაქეებისთვის უკვე მიმდინარეობს.

როგორც BBC წერს, ვაქცინაცია პაციენტებს ორჯერ უნდა ჩაუტარდეთ. იმუნიტეტის გამომუშავება პირველი ვაქცინაციიდან მე-12 დღიდან იწყება, მეორე დოზით ვაქცინაცია კი 21-ე დღეს უნდა მოხდეს. ვაქცინირებულ ადამიანებში იმუნიტეტის სტულად გამომუშავებას 28 დღე სჭირდება.

ევროკავშირს კომპანიისთვის ამჟამად 300 მილიონი დოზა ვაქცინა აქვს შეკვეთილი, რაც 150 მილიონ ადამიანს მოხმარდება, თუმცა თავდაპირველად მისი მცირე რაოდენობა იქნება ხელმისაწვდომი.

მწარმოებლის განცხადებით, კომპანია მზადაა, ვაქცინის გარკვეული დოზების დაუყოვნებლივ ტრანსპორტირება განახორციელოს, რათა აცრის პროცესი 25 დეკემბრამდე დაიწყოს. მიუხედავად ამისა, ამ ოდენობით ვაქცინის მიწოდებას შესაძლოა რამდენიმე თვე დასჭირდეს.