ნეტგაზეთი | საოლქოებთან მიმდინარე აქციები აფერხებს საარჩევნო ადმინისტრაციის მუშაობას – ზურაბიშვილი საოლქოებთან მიმდინარე აქციები აფერხებს საარჩევნო ადმინისტრაციის მუშაობას – ზურაბიშვილი – Netgazeti
RU | GE  

საოლქოებთან მიმდინარე აქციები აფერხებს საარჩევნო ადმინისტრაციის მუშაობას – ზურაბიშვილი

საქართველოს პრეზიდენტი საოლქო საარჩევნო კომისიების შენობებთან მიმდინარე საპროტესტო აქციებს ეხმაურება. სალომე ზურაბიშვილის თქმით, აქციები, “განსაკუთრებით კი აქციის მონაწილეთა აგრესიული ქმედებები”, ცესკოს მუშაობას აფერხებს.

“საოლქო საარჩევნო კომისიების შენობებთან მიმდინარე საპროტესტო აქციები, განსაკუთრებით კი აქციის მონაწილეთა აგრესიული ქმედებები, აფერხებს საარჩევნო ადმინისტრაციის მუშაობას, რაც მშვიდ გარემოს საჭიროებს იმისთვის, რომ დაცული იქნას თითოეული ამომრჩევლის ხმა.

ყველას მოგიწოდებთ სიმშვიდისკენ და სახელმწიფო ინსტიტუტების პატივისცემისკენ. ასევე მოგიწოდებთ, მკაცრად დაიცვათ ყველა რეკომენდაცია, რაც ვირუსის გავრცელების პრევენციისათვის არის აუცილებელი. ეს არის ყველა პოლიტიკური პარტიის, მათი ლიდერებისა და აქციის თითოეული მონაწილის პასუხისმგებლობა!” – აღნიშნავს ის.

საოლქო საარჩევნო კომისიების შენობებთან ოპოზიციის წარმომადგენლებისა და მისი მხარდამჭერების საპროტესტო აქციები მეორე დღეა, დაძაბულობის ფონზე მიმდინარეობს. პროტესტის მეორე დღეს დემონსტრანტები შეიკრიბნენ როგორც თბილისში, ისე ქუთაისში განთავსებულ საოლქო კომისიებთან. ვაკეში მიმდინარე აქციაზე დააკავეს ენმ-ის წევრი ზვიად კუპრავა.

ვაკის საოლქო კომისიასთან ზვიად კუპრავა დააკავეს

ნეტგაზეთის მასალების სხვა გამოცემებში გადაბეჭდვის წესი
ავტორი
მიხეილ გვაძაბია არის ნეტგაზეთის რეპორტიორი 2017 წლის სექტემბრიდან