სამოქალაქო ავიაციის სააგენტოს ინფორმაციით, 11 აგვისტოს თბილისი-ბერლინი-თბილისის მიმართულებით მორიგი სპეციალური რეისი შესრულდება.
„ქართველი სტუდენტების გერმანიაში გამგზავრების და საქართველოს მოქალაქეების სამშობლოში დაბრუნების მიზნით, საქართველოს მთავრობის ხელშეწყობით, თბილისი-ბერლინი-თბილისის მიმართულებით მორიგი სპეციალური რეისი შესრულდება“, – წერს სააგენტო.
მათივე ინფორმაციით, ფრენა, რომელსაც Georgian Airways 11 აგვისტოს შეასრულებს, შემდეგი განრიგითაა დაგეგმილი:
- 11 აგვისტო, თბილისი-ბერლინი-თბილისი (გაფრენა 11:00, მოფრენა 19:30)
საქართველოს მთავრობის სუბსიდირების შემდეგ, ბილეთი ფასი 199 ევროზე მეტი არ იქნება.
„ავიარეისი Boeing B737-800 ტიპის საჰაერო ხომალდით შესრულდება. საქართველოს ეკონომიკისა და მდგრადი განვითარების სამინისტროს სამოქალაქო ავიაციის სააგენტოს მიერ. ავიაკომპანიას აღნიშნულ საჰაერო ხაზზე ჩარტერული საჰაერო მიმოსვლის განხორციელებისათვის აუცილებელი ნებართვა დღეს, 7 აგვისტოს მიენიჭა,“ – აცხადებს სამინისტრო.
ამ სპეციალური რეისის შესახებ მანამდე ინფორმაცია საქართველოს მთავრობამ გაავრცელა. ეკონომიკის მინისტრმა 5 აგვისტოს განაცხადა, რომ ხელისუფლება კვლავ დაეხმარება გერმანიაში მოკლევადიანი დასაქმების მსურველ ქართველ სტუდენტებს და ფრენების სუბსიდირებას მოახდენს.
გერმანიაში დასაქმების მსურველი სტუდენტებისთვის სუბსიდირებული ავიარეისი ისევ დაინიშნება
