ნეტგაზეთი | 520-ე დადგენილების გადახედვაზე საუბარი არ არის – გახარია 520-ე დადგენილების გადახედვაზე საუბარი არ არის – გახარია – Netgazeti
RU | GE  

520-ე დადგენილების გადახედვაზე საუბარი არ არის – გახარია

პრემიერ-მინისტრ გიორგი გახარიას თქმით, 520-ე დადგენილების გადახედვას მთავრობა არ აპირებს. ამის შესახებ გახარიამ პარლამენტში ზურაბ ჭიაბერაშვილის კითხვის საპასუხოდ განაცხადა.

“520-ე დადგენილება არის რთული, მაგრამ უკიდურესად საჭირო დადგენილება იმისთვის, რომ ჯანდაცვის სისტემა ქვეყანაში იყოს უფრო დაბალანსებული და სტაბილური, მდგრადი გრძელვადიანი გამოწვევების წინაშე. ამიტომ 520-ე დადგენილების გადახედვაზე საუბარი დღეს არ არის. დადგენილაბში შეიძლება გარკვეული ცვლილებები შევიდეს, ეს არის და ეს”, – განაცხადა გახარიამ.

ჭიაბერაშვილის თქმით, 22 მაისს 9 კლინიკამ პრემიერს წერილით მიმართა, რომ მათ უწევთ დამატებითი ხარჯების გაწევა, გეგმური ოპერაციები პრაქტიკულად გაჩერებულია და შემოსავლები შემცირებულია. ჭიაბერაშვილმა პრემიერს ჰკითხა, თუ რას აპირებდნენ 520-ე დადგენილებასთან დაკავშირებით, აპირებდნენ თუ არა მის გაუქმებას.

მთავრობის მიერ 2019 წლის 5 ნოემბერს მიღებული 520-ე დადგენილებით, სამედიცინო დაწესებულებები, რომლებიც ჩართულნი არიან საყოველთაო ჯანდაცვის პროგრამაში, იღებენ ვალდებულებას, პაციენტებს სერვისები სახელმწიფოს მიერ დადგენილი ერთიანი ტარიფით მიაწოდონ.

დადგენილებითვე განისაზღვრა ტარიფები ისეთ სამედიცინო სერვისებზე, როგორებიცაა კარდიოქირურგია, ინტერვენციული კარდიოლოგია და არითმოლოგია.

ნეტგაზეთის მასალების სხვა გამოცემებში გადაბეჭდვის წესი
ავტორი