ბოლნისში COVID-19 სასწრაფო დახმარების კიდევ 5 თანამშრომელს დაუდასტურდა. ამის შესახებ “ნეტგაზეთს”  სასწრაფო სამედიცინო დახმარების ცენტრში დაუდასტურეს.

როგორც ცენტში “ნეტგაზეთს” უთხრეს, ხუთივე ინფიცირებული საკარანტინო ზონაში იმყოფებოდა დაავადების დადასტურებამდე.

სასწრაფო დახმარების პერსონალის ინფიცირების ფაქტი ბოლნისში 14 აპრილსაც დადასტურდა. მაშინაც, ახალი კორონავირუსით გამოწვეული ინფექცია 5 ადამიანს დაუდგინდა. მათი კონტაქტები კარანტინსა და თვითიზოლაციაში იმყოფებიან.

მარნეულისა და ბოლნისის მუნიციპალიტეტები პირველი იყო, რომლებიც ახალი კორონავირუსის გავრცელების შესაჩერებლად 23 მარტს საკარანტინო ზონად გამოცხადდა. ამის მიზეზად ამ მუნიციპალიტეტებში ვირუსის შიდა გადაცემის შემთხვევების აღმოჩენა დასახელდა.