ნეტგაზეთი | მარაგი შეივსო 20 ათასი PCR ტესტით, საღამოს ველოდებით ამდენივეს – გამყრელიძე მარაგი შეივსო 20 ათასი PCR ტესტით, საღამოს ველოდებით ამდენივეს – გამყრელიძე – Netgazeti
RU | GE  

მარაგი შეივსო 20 ათასი PCR ტესტით, საღამოს ველოდებით ამდენივეს – გამყრელიძე

დაავადებათა კონტროლის ეროვნული ცენტრის დირექტორის, ამირან გამყრელიძის თქმით, საქართველოში კორონავირუსის მოლეკულური პი-სი-არ (PCR) ტესტების მარაგი 20 ათასით შეივსო, საღამოს კი კიდევ ამდენივეთი გაიზრდება.

ეს ის ტესტებია, რომლებიც კორონავირუსის აღმოჩენისთვის გამოიყენება და მას NCDC ოქროს სტანდარტად მოიხსენიებს.

„დღევანდელი რიცხვით 6 000 პი-სი-არ ტესტზე მეტია ქვეყანაში ჩატარებული. დღეს შეივსო სერიოზულად მარაგი – 20 000 ტესტით, და კიდევ ველოდებით საღამოს თვითმფრინავს კორეიდან, კიდევ 20 000 ტესტით.

შემდგომ გეგმაა, რომ ჩვენ სამი თვის განმავლობაში 100-120 ათასამდე ავიდეთ. ასევე, საკოორდინაციო საბჭოსა და პრემიერის დავალებაა, რომ ყოველდღიური ტესტირებების რაოდენობა გაიზარდოს“, – ამბობს გამყრელიძე.

მისი თქმით, ამჟამად ქვეყანაში 5 ლაბორატორიაა, რომელიც ამ ანალიზებს ატარებს – „ჩვენ 21 რიცხვიდან დაგვემატება კიდევ 6, შემდგომ -კიდევ 6 ლაბორატორია და გეგმა არსებობს, თუ როგორ უნდა ავიდეთ 1000-1500 ტესტირებამდე დღეში და შემდგომ უფრო მეტზეც“.


საქართველოში, 16 აპრილის მონაცემებით, კორონავირუსი 336 შემთხვევაში დადასტურდა – ბოლო 24 საათში,მაჩვენებელი 30-ით გაიზარდა. აქედან გამოჯანმრთელდა 75, ხოლო გარდაიცვალა 3.

ეს მონაცემი ნიშნავს, რომ ქვეყანაში აქტიური 259 პაციენტია, ანუ ის პირი, ვისაც კორონავირუსი დაუდასტურდა და ვინც ახლა რომელიმე კლინიკაში მკურნალობს.

ნეტგაზეთის მასალების სხვა გამოცემებში გადაბეჭდვის წესი
ავტორი
ნინო ბიძინაშვილი არის რეპორტიორი 2017 წლის 25 სექტემბრიდან