საკონსტიტუციო ცვლილებების სახალხო განხილვის კომისია შეიქმნა

საქართველოს პარლამენტმა საკონსტიტუციო ცვლილებების პროექტის გამოქვეყნებისა და საყოველთაო-სახალხო განხილვის საორგანიზაციო კომისია შექმნა.

კომისიის შექმნას 114-მა დეპუტატმა დაუჭირა მხარი, არცერთის წინააღმდეგ. კომისია ცხრა წევრისგან დაკომპლექტდა:

  1. არჩილ თალაკვაძე – კომისიის თავმჯდომარე, “ქართული ოცნება”;
  2. მამუკა მდინარაძე – პარლამენტის თავმჯდომარის მოადგილე, “ქართული ოცნება”;
  3. ირმა ინაშვილი – ფრაქცია “საქართველოს პატრიოტები”;
  4. სერგი კაპანაძე – “ევროპული საქართველო”;
  5. მარიამ ჯაში – “დამოუკიდებელი დეპუტატები”;
  6. ირაკლი კობახიძე – “ქართული ოცნება”;
  7. თინა ბოკუჩავა – “ერთიანი ნაციონალური მოძრაობა”;
  8. თენგიზ შარმაშანაშვლი – პარლამენტის თავმჯდომარის მრჩეველი;
  9. თორნიკე ჭეიშვილი – კომისიის მდივანი, პარლამენტის თავმჯდომარის მრჩეველი.

საპროცედურო საკითხთა კომიტეტის თავმჯდომარის, გურამ მაჭარაშვილის განმარტებით, კომისიაში საქართველოს პარლამენტის თავმჯდომარის მრჩევლების შეყვანა საორგანიზაციო საკითხების უზრუნველსაყოფად მოხდა.

საკონსტიტუციო ცვლილებების საყოველთაო-სახალხო განხილვა 1 თვის განმავლობაში უნდა გაიმართოს, რის შემდეგაც კონსტიტუციური კანონის პროექტის განხილვა პარლამენტში გაგრძელდება. კორონავირუსის გავრცელების პრევენციის მიზნით, საკონსტიტუციო ცვლილებების საყოველთაო-სახალხო განხილვის ჩატარება ძირითადად ონლაინ რეჟიმში იგეგმება.

საკონსტიტუციო ცვლილებების პროექტის მიხედვით, 2020 წლის საპარლამენტო აჩრევნების შედეგად პარლამენტი პროპორციული წესით არჩეული 120 დეპუტატისგან და 30 მაჟორიტარისგან დაკომპლექტდება.

ნეტგაზეთის მასალების სხვა გამოცემებში გადაბეჭდვის წესი
ავტორი
ნინო ჩიჩუა არის "ნეტგაზეთის" რეპორტიორი 2018 წლის სექტემბრიდან.