საპარლამენტო უმრავლესობის ლიდერი მამუკა მდინარაძე აცხადებს, რომ მმართველი პარტია საარჩევნო სისტემაზე საკონსტიტუციო ცვლილებების პროექტს საზოგადოებას რამდენიმე დღეში წარუდგენს.

მდინარაძე ამბობს, რომ პროექტში გათვალისწინებულია ე.წ. 40-პროცენტიანი მხარდაჭერის პრინციპი, რომლის მიხედვითაც, გამარჯვებული სუბიექტი  40 პროცენტზე ნაკლები მხარდაჭერის მოპოვების შემთხვევაში, ვერცერთი კონფიგურაციით 75 მანდატზე მეტის მოპოვებას ვერ შეძლებს და მთავრობას ვერ დააკომპლექტებს:

“თუ საუბარია მეტ პროპორციულობაზე, შემიძლია გითხრათ, რომ იმ შემთხვევაში 2016 წელს რომ ჩატარებულიყო ჩვენ მიერ შეთავაზებული მოდელით, რომელიც 3-4 დღეში წარედგინება საზოგადოებას წერილობითი ფორმით, არჩევნებში “ქართული ოცნება” მივიღებდით იგივე შედეგს მანდატების მიხედვით, რაც 5 პროცენტიანი ბარიერის არსებობის პირობებში პროპორციული არჩევნების დროს.

ე.წ. ჩამკეტი, რომელზეც ამ დღეების განმავლობაში ვსაუბრობთ, გულისხმობს ამას – ვერცერთი მანდატით მეტი ვიდრე ეს შესაძლებლობა არსებობს პროპორციულ სისტემაში 5 პროცენტიანი ბარიერით. თუ საუბარია თითონ ბარიერზე, შეთანხმდნენ ოპოზიციური პარტიები და რა ბარიერსაც ამ შეთანხმების პირობებში მოიფიქრებენ, იმასაც შევთავაზებთ” – ამბობს მდინარაძე.