ნეტგაზეთი | შოთაძის კანდიდატურას იურიდიულმა კომიტეტმა მხარი დაუჭირა შოთაძის კანდიდატურას იურიდიულმა კომიტეტმა მხარი დაუჭირა – Netgazeti

შოთაძის კანდიდატურას იურიდიულმა კომიტეტმა მხარი დაუჭირა

ირაკლი შოთაძის კანდიდატურას მთავარი პროკურორის თანამდებობაზე იურიდიულმა კომიტეტმა მხარი დაუჭირა. კენჭისყრას იურიდიული კომიტეტის წევრთა ნაწილი არ ესწრებოდა. შოთაძეს ხმა 8 წევრმა მისცა.

კომიტეტმა ამ გადაწყვეტილებით პარლამენტს რეკომენდაცია მისცა, რომ შოთაძე მთავარ პროკურორად შეირჩეს.

დღეს კომიტეტის სხდომაზე შოთაძეს დაახლოებით 6 საათს უსმენდნენ.

საპროკურორო საბჭომ პარლამენტს გენპროკურორობის კანდიდატად ყოფილი მთავარი პროკურორი ირაკლი შოთაძე 7 თებერვალს წარუდგინა.

შოთაძეს მხარი საბჭოს 13 წევრიდან 11-მა დაუჭირა. ერთმა ხმა სოფიო შენგელიას მისცა, კენჭისყრას არ ესწრებოდა “ევროპული საქართველოს” წევრი ოთო კახიძე.


გენერალური პროკურორის თანამდებობა ვაკანტური მას შემდეგ გახდა, რაც ბოლო გენპროკურორმა, შალვა თადუმაძემ პოსტი დატოვა. ამის შემდეგ ის ჯერ უზენაესი სასამართლოს უვადო მოსამართლედ დანიშნეს, შემდეგ კი უზენაესი სასამართლოს სისხლის სამართლის პალატის თავმჯდომარე გახდა.

ირაკლი შოთაძე გენერალური პროკურორის თანამდებობიდან 2018 წლის 31 მაისს გადადგა. ეს პოსტი მას 2015 წლიდან ეკავა.

შოთაძის გადადგომას წინ უძღოდა ხორავას ქუჩაზე 2017 წლის დეკემბერში მოკლული დავით სარალიძის ოჯახისა და მისი მხარდამჭერების აქციები გამოძიების პროცესში არსებული დარღვევების გასაპროტესტებლად.

საპროკურორო საბჭოს 16 იანვრის განცხადების თანახმად, შოთაძის კანდიდატურა მათ წარუდგინა საქართველოს ტექნიკურმა უნივერსიტეტმა.

ნეტგაზეთის მასალების სხვა გამოცემებში გადაბეჭდვის წესი
ავტორი
ნინო ბიძინაშვილი არის რეპორტიორი 2017 წლის 25 სექტემბრიდან