გიორგი მარგველაშვილმა კონგრესმენებს ამერიკის შეერთებული შტატების დამოუკიდებლობის დღე მიულოცა. შეხვედრისას მხარეებმა საქართველო-აშშ-ის ორმხრივ ურთიერთობაზე ისაუბრეს. ხაზგასმით აღინიშნა, რომ აშშ საქართველოს სტრატეგიული პარტნიორია და მნიშვნელოვანია ამ თანამშრომლობის კიდევ უფრო გაძლიერება და გაღრმავება, აცხადებს პრეზიდენტის ადმინისტრაცია.
საქართველოს პრეზიდენტმა ყურადღება ქვეყნებს შორის ეკონომიკური ურთიერთობის განვითარებაზე გაამახვილა და საქართველო-აშშ-ის შორის თავისუფალი ვაჭრობის მიმართულებით მუშაობის დაწყების მნიშვნელობაზე ისაუბრა.
კონგრესმენებმა აღნიშნეს, რომ აუცილებელია საქართველოში დემოკრატიული რეფორმების განვითარების ხელშეწყობა. საუბარი რეგიონში შექმნილ ვითარებასაც შეეხო. საქართველოს პრეზიდენტმა კონგრესმენებს მადლობა გადაუხადა საქართველოს დამოუკიდებლობის, სუვერენიტეტისა და ტერიტორიული მთლიანობის მხარდაჭერისათვის, ასევე, ევროატლანტიკურ სტრუქტურებში ინტეგრაციის პროცესში თანადგომისთვის.
პრეზიდენტის ადმინისტრაციის ცნობით, ხაზგასმით აღინიშნა რუსეთის ფედერაციასა და სოხუმისა და ცხინვალის საოკუპაციო რეჟიმებს შორის გაფორმებული ხელშეკრულებების დაუშვებლობა. შეხვედრის ერთ-ერთი მთავარი თემა საქართველოსა და ამერიკას შორის საერთაშორისო უსაფრთხოებისა და ანტიტერორისტული საქმიანობის მიმართულებით წარმატებული თანამშრომლობის გაგრძელება იყო.
მხარეებმა ყურადღება ნატო-ს მისიებში საქართველოს მონაწილეობის მნიშვნელობაზეც გაამახვილეს. როგორც კონგრესმენებმა აღნიშნეს, ამერიკის შეერთებული შტატები აფასებს საქართველოს მიერ შეტანილ წვლილს საერთაშორისო მისიებში.
საქართველოში სამუშაო ვიზიტით მყოფ აშშ-ის კონგრესმენების დელეგაციას რესპუბლიკელი კონგრესმენი პიტერ როსკემი ხელმძღვანელობს.
