ნეტგაზეთი | 112-ის გადასახადს ფიზიკური და იურიდიული პირები თანაბრად გადაიხდიან – 40 თეთრი თვეში 112-ის გადასახადს ფიზიკური და იურიდიული პირები თანაბრად გადაიხდიან – 40 თეთრი თვეში – Netgazeti

112-ის გადასახადს ფიზიკური და იურიდიული პირები თანაბრად გადაიხდიან – 40 თეთრი თვეში

2020 წლის იანვრიდან საქართველოს მთავრობამ „112“-ის გადასახადი ფიზიკური და იურიდიული პირებისთვის გაათანაბრა და 40 თეთრი გახადა. შესაბამისად, ფიზიკური პირებისთვის აღნიშნული გადასახადი თვეში 20 თეთრით გაძვირდა, იურიდიული პირებისთვის კი 10 თეთრით შემცირდა.

მთავრობის დადგენილებით, საზოგადოებრივი უსაფრთხოების მართვის ცენტრ „112“-ის მომსახურების საფასური ფიქსირებული გეოგრაფიული ან არაგეოგრაფიული ზონის აბონენტის სააბონენტო ნომერზე ყოველ კალენდარულ თვეში, მიუხედავად აბონენტად გახდომის რიცხვისა, ფიზიკური და იურიდიული პირებისთვის [მათ შორის, დაწესებულებისთვის], 2020 წლის იანვრიდან შეადგენს 40 თეთრს [დღგ-ის ჩათვლით].

შესაბამისი დადგენილება საქართველოს მთავრობამ 2019 წლის 30 დეკემბერს მიიღო და 31 დეკემბერს შევიდა ძალაში.

ამავე დადგენილებით, იგივე გადასახადი მობილური სატელეფონო მომსახურების მიმღები აბონენტის სააბონენტო ნომერზე ყოველ კალენდარულ თვეში, მიუხედავად აბონენტად გახდომის რიცხვისა, ფიზიკური და იურიდიული პირებისათვის [მათ შორის, დაწესებულებისთვის], ასევე შეადგენს 40 თეთრს [დღგ-ის ჩათვლით].

2019 წლის ივლისში საქართველოს საკონსტიტუციო სასამართლომ არაკონსტიტუციურად ცნო 112-ის გადასახადი, რომელიც ფიზიკური პირებისთვის 20 თეთრი, ხოლო იურიდიული პირებისთვის 50 თეთრი იყო, თუმცა ეს არ ნიშნავდა იმას, რომ გადასახადი საბოლოოდ გაუქმდებოდა.

სასმართლოს 2018 წელს სარჩელით იურისტმა ლევან ალაფიშვილმა და „კს ალაფიშვილი და ყავლაშვილი – საქართველოს ადვოკატთა ჯგუფმა“ მიმართა.

სასამართლომ მიიჩნია, რომ ეს კონკრეტული მოსაკრებელი საქართველოს პარლამენტს უნდა დაედგინა, შესაბამისად, მთავრობას არ ჰქონდა უფლება მოსაკრებელი შემოეღო ან მისი განაკვეთი განესაზღვრა. ამასთან, სასამართლომ 2019 წლის 31 დეკემბრამდე გადაავადა სადავო ნორმების ძალადაკარგულად გამოცხადება, „რადგან მთავრობასა და პარლამენტს ჰქონდეთ გონივრული ვადა იმისთვის, რომ 112-ის დაფინანსების საკითხი გადაწყვიტონ“.

საქართველოს მთავრობის მიერ ახალი ტარიფის დადგენამდე რამდენიმე დღით ადრე, 2019 წლის 19 დეკემბერს, საქართველოს პარლამენტმა მიიღო კანონი „საქართველოს შინაგან საქმეთა სამინისტროს საჯარო სამართლის იურიდიული პირის – საზოგადოებრივი უსაფრთხოების მართვის ცენტრ „112“-ის შესახებ“.

ამ კანონის მიხედვით, საზოგადოებრივი უსაფრთხოების მართვის ცენტრ „112“-ის მომსახურების საფასურის გადამხდელები არიან ფიქსირებული გეოგრაფიული ან არაგეოგრაფიული ზონის აბონენტი და მობილური სატელეფონო მომსახურების მიმღები აბონენტი.

რაც შეეხება მომსახურების საფასურს, ამავე კანონში აღნიშნულია, რომ „საქართველოს მთავრობის დადგენილებით შეიძლება დაწესდეს საფასური 0.20-დან 0.50 ლარამდე [დღგ‑ის ჩათვლით]“.

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com