“არც ველოდი, რომ დღეს ესე მოხდებოდა. გუშინ მომცეს ინფორმაცია, რომ 31-ში იყო სააპელაციო სასამართლო, რომელზეც, მართალი გითხრათ, თავს ვიკავებდი. ალბათ ემოციებით ვარ დატვირთული და ცოტა ძნელია.. მადლობა მინდა ვუთხრა ყველას, ვინც გულთან მიიტანა ჩემი ეს სიტუაცია, პირველ რიგში მთავრობა იქნება, პარლამენტი, პოლიცია, უშიშროება“…
პატიმრობიდან გათავისუფლებულმა ვაჟა გაფრინდაშვილმა გორში ჟურნალისტებთან პირველი კომენტარი გააკეთა: თქვა, რომ კარგად არის და მადლობა გადაუხადა ყველას მხარდაჭერისთვის და ჩართულობისთვის.
„ნება მომეცით, ცოტა დავისვენო და მერე ყველას ყველანაირ ინფორმაციას მოგაწვდით“, – თქვა მან. „დიდი მადლობა ყველას მხარდაჭერისთვის… გმადლობთ, კარგად ვარ… უდიდეს მადლობას ვუხდი ყველას, ვინც გვერდით მედგა, მაგრამ განსაკუთრებით ჩემს ლამაზ მეუღლეს და ბრწყინვალე შვილებს“.
„სამწუხაროდ ინფორმაცია ნაკლები მქონდა, მაგრამ მე რასაც ვუყურე, ასე გაერთიანებულად ყველამ საქართველოს საქმე ვაკეთოთ“, – განაცხადა მან.
მანამდე სუს-მა გაავრცელა ვიდეოკადრები, სადაც გორის პოლიციაში მყოფი გაფრინდაშვილი ამბობს, რომ არ ელოდა გათავისუფლებას:
საქართველოს უსაფრთხოების სამსახურის თანახმად, ექიმმა ვაჟა გაფრინდაშვილმა ცხინვალის საპატიმრო დატოვა და იგი უკვე საქართველოს ცენტრალური ხელისუფლების მიერ კონტროლირებად ტერიტორიაზე იმყოფება.
ცოტა ხნით ადრე გავრცელდა ცნობა, რომ სამხრეთ ოსეთის დე ფაქტო პრეზიდენტმა ანატოლი ბიბილოვმა 27 დეკემბერს ხელი მოაწერა ბრძანებას ექიმი ვაჟა გაფრინდაშვილის შეწყალების თაობაზე. დოკუმენტი დე ფაქტო პრეზიდენტის საიტზე გამოქვეყნდა.
რუსმა სამხედროებმა ვაჟა გაფრინდაშვილი 9 ნოემბერს დააკავეს. 20 დეკემბერს მას ცხინვალის სასამართლომ ერთი წლით და 9 თვით პატიმრობა მიუსაჯა საზღვრის კვეთის ბრალდებით.