ხარაგაულის მუნიციპალიტეტის სოფელ ლაშეში 100-113 მილიონი წლის წინანდელი ნამარხი თავფეხიანი მოლუსკები – ამონიტები აღმოაჩინეს. ინფორმაციას ამის შესახებ ხარაგაულის მუნიციპალიტეტის მერია ავრცელებს.

როგორც ხარაგაულის მერიაში ამბობენ, ნამარხი გზის მშენებლობის პროცესში მშენებლებმა აღმოაჩინეს და მერიას დაუკავშირდნენ, რის შემდეგაც, ისტორიული მუზეუმის მოწვევით, სოფელ ლაშეში პალეოანთროპოლოგიისა და პალეობიოლოგიის კვლევითი ინსტიტუტის ხელმძღვანელი თენგიზ მეშველიანი, გეოლოგია-პალეონტოლოგიის ფონდის მთავარი კურატორი რუსუდან ჩაგელიშვილი და ფონდის მეცნიერთანამშრომელი, გეოლოგი, პალეონტოლოგი, ნიკა ვანიშვილი ჩამოვიდნენ.

მერიის განცხადებით, არქეოლოგიურმა ექსპედიციამ ადგილზე დაათვალიერა აღმოჩენილი მოლუსკები, აიღეს ქანები და დაადგინეს, რომ ისინი ქვედა ცარცული პერიოდისაა.

“ცარცული პერიოდი 135-137 მლნ. წლის წინათ დაიწყო და დაახლოებით 70 მლნ. წელი გრძელდებოდა. გვიანდელ ცარცულ ეპოქაში დედამიწის ისტორიაში ერთ-ერთი უდიდესი ტრანსგრესიის შედეგად ზღვამ მოიცვა აღმოსავლეთ ევროპის, ჩრდილოეთ ამერიკის, აფრიკის და ავსტრალის ბაქნების ვრცელი ფართობები. გვიანდელ ცარცულ ეპოქაში დედამიწის მრავალ ადგილას აღინიშნება მძლავრი ვულკანიზმი.

ადრინდელი ცარცული ეპოქის ხმელეთის ფლორაში ჭარბობდა გვიმრანაირები და შიშველთესლიანები. ზღვიურ უხერხემლოთა ფაუნაში ჭარბობდნენ მოლუსკები, განსაკუთრებით ამონიტები და ბელემნიტები. სწორედ ასეთი ამონიტები აღმოჩნდა სოფელ ლაშეში, სადაც როგორც მეცნიერ-თანამშრომლები ამბობენ, კერძო საკუთრებაა და სავარაუდოდ ნგრევას ვეღარ გააგრძელებენ”, – ვკითხულობთ ხარაგაულის მერიის მიერ გავრცელებულ განცხადებაში.

აღმოჩენილი ამონიტები ხარაგაულის ისტორიულ მუზეუმში განთავსდება.