ახალი ამბები

პროკურატურა ამბობს, რომ მელიას ტელევიზიაში მისვლაზე რეაგირება ექნება

10 სექტემბერი, 2019 • 1185
პროკურატურა ამბობს, რომ მელიას ტელევიზიაში მისვლაზე რეაგირება ექნება

საქართველოს პროკურატურის თქმით, ნიკა მელიას ტელეკომპანია “კავკასიაში“ მისვლას უწყების მხრიდან რეაგირება მოჰყვება.

დღეს, 10 სექტემბერს, ნიკა მელია “კავკასიაში“ ინტერვიუზე მივიდა, უწყებაში კი ამბობენ, რომ ამ ფაქტზე იმსჯელებენ და შემდეგომ მისცემენ აღნიშნულ ფაქტს შესაბამის სამართლებრივ რეაგირებას.

თბილისის საქალაქო სასამართლოს 27 ივნისის გადაწყვეტილებით, ნიკა მელიას საცხოვრებელი ადგილის (სახლის) დატოვება საგამოძიებო ორგანოს ინფორმირებისა და თანხმობის გარეშე ეკრძალება. თუმცა ჟურნალისტებთან საუბრისას ნიკა მელია ამბობს, რომ სასამართლოს ეს შეზღუდვა არაკონსტიტუციურია და მას დეპუტატის უფლებამოსილების შესრულების საშუალებას არ აძლევს.

“ვაპირებ, ვგეგმავ და გადახედვას არ ექვემდებარება ჩემი კონსტიტუციური უფლებამოსილების განხორციელება, რომელიც გულისხმობს დეპუტატის სრულფასოვან საქმიანობას, როგორც პარლამენტში, ასევე პარლამენტს მიღმა. ამასთანავე, ნებისმიერი ტელეკომპანიის პირდაპირ თუ არპირდაპირ ეთერში. პროკურატურას ეცნობა ცნობის სახით, მაგრამ მაპატიეთ ახლა…. პროკურორის უბრალოდ მითითებით, დეპუტატი არ უნდა დადიოდეს, რომელიღაც ტელევიზიაში – კი და რომელიღაცაში არა…. ამ მითითებას მე არ მივიღებ და არც მივიღე დღეს. ის არის სრულიად არაკონსტიტუციური.

პროკურორი მე მომცემს ნებას სახლიდან გამოსვლის  ან სახლში შესვლის, თუ ნებისმიერ სახის უფლებას – არ ვაპირებ მე დამორჩილებას, კიდევ ერთხელ ვამბობ, იმიტომ, რომ ეს არ მოდის შესბამისობაში კონსტიტუციასთან“ ,- ამბობს ნიკა მელია დღეს ჟურნალისტებთან მას შემდეგ, რაც მან ტელეკომპანია “კავკასიას“ ინტერვიუ მისცა.

მანამდე ნიკა მელიამ საკუთარ ფეისბუკ-გვერდზე ვიდეომიმართვა გაავრცელა, სადაც თქვა, რომ შეზღუდვის მიუხედავად ტელეკომპანია “კავკასიაში“ მაინც მივიდოდა.

Posted by Nika Melia / ნიკა მელია on სამშაბათი, 10 სექტემბერი, 2019

ვიდეოში მელია ამბობს, რომ სასამართლო გადაწყვეტილების გამოცხადების შემდეგ ის შეზღუდვებს არ არღვევდა და საპარლამენტო სხდომას ელოდებოდა. მისი თქმით, პარლამენტში გუშინწინ გამოცხადდა, თუმცა მანამდე მისმა ადვოკატმა გიორგი კონდახიშვილმა პროკურორს ზემოხსენებულის შესახებ ფორმალურად აცნობა და თანხმობა მიიღო.

“მივედი სხდომაზე, სხდომაზე სანამ სიტყვით გამოსვლას დავიწყებდი, მეუღლემ მაცნობა, რომ სახლში პრობაციის ეროვნული სააგენტოს თანამშრომლები იყვნენ მოსულები, მათ ოქმი შეადგინეს, რომლის მიხედვით, თითქოს მე შეთანხმების გარეშე მივედი პარლამენტში“ – ამბობს ნიკა მელია.

მისი თქმით, პარლამენტში მისვლიდან მეორე დღეს მასთან პრობაციის სააგენტოს თანამშრომლები კიდევ ერთხელ მივიდნენ და შეუცვალეს სამაჯური, რომელიც უწყების მიერ ელექტორნული ზედამხედველობისთვის გამოიყენება.

“მეტიც, მთხოვეს, რომ სამაჯური ფეხის კიდურზე გამეკეთებინა, რაზეც უარი ვუთხარი… დაიწყო გაუგებარი რაღაც მოძრაობები, პარლამენტში მისვლის შემდეგ, სამაჯურის და სახლის გარშემო.

დღეს ვაპირებ დათო აქუბარდიას გადაცემაში მისვლას ტელეკომპანია “კავკასიაზე“, რის შესახებაც ადვოკატის მხრიდან ფორმალურად პროკურორს ეცნობა, რაზეც კატეგორიული უარი მიიღო ადვოკატმა, რომ მე არ მაქვს უფლება სახლიდან გავიდე. დეპუტატის უფლებამოსილება, მათი აზრით, ხორციელდება პარლამენტში და არა რომელიღაცა ტელევიზიაში, თუნდაც, ოპოზიციურ ტელევიზიაში. დღეს, მიუხედავად შეზღუდვისა, გავალ სახლიდან, მივალ “კავკასიაში“, ამის შემდეგ კი ინგა გრიგოლიას ჩავერთვები გადაცემაში. მინდოდა, რომ ეს ყველაფერი გცოდნოდათ თქვენ, რა სისულელეს გააკეთებს “ ქართული ოცნება“ მე წარმოდგენა არ მაქვს“, – ამბობს მელია ვიდეოში.

 

საქართველოს პროკურატურა / The Prosecution Service of Georgia

Posted by Nika Melia on Tuesday, September 10, 2019


მოკლედ:

  • გენერალურმა პროკურატურამ ნიკა მელიას ბრალი წაუყენა 20 ივნისის აქციის მიმდინარეობისას ჯგუფური ძალადობის ხელმძღვანელობისა და მასში მონაწილეობისთვის. ბრალის დამტკიცების შემთხვევაში მელიას 6-დან 9 წლამდე პატიმრობა ემუქრება.
  • 28 ივნისს თბილისის საქალაქო სასამართლოს მოსამართლე თემურ გოგოხიამ არ დააკმაყოფილა პროკურატურის შუამდგომლობა “ერთიანი ნაციონალური მოძრაობის” ლიდერისთვის აღკვეთის ღონისძიების სახით პატიმრობის გამოყენებაზე და მას 30 000 ლარის ოდენობით გირაო შეუფარდა.
  • საქართველოს პარლამენტმა წინასწარი თანხმობა მისცა გენერალურ პროკურორს დეპუტატ ნიკა მელიასთვის პატიმრობის გამოყენების მიზნით სასამართლოსთვის მიმართვაზე. შესაბამისი დადგენილება პარლამენტმა 91 ხმით 0-ის წინააღმდეგ მიიღო.
  • 20 ივნისს, რუსეთის დუმის დეპუტატის სერგეი გავრილოვის გამოსვლას საქართველოს პარლამენტში  პროტესტი მოყვა. საქართველოს ხელისუფლების წინააღმდეგ დაიწყო მასშტაბური საპროტესტო აქციები. აქციაზე მოითხოვეს შინაგან საქმეთა მინისტრ გიორგი გახარიას, პარლამენტის თავმჯდომარის ირაკლი კობახიძის და სახელმწიფო უსაფრთხოების სამსახურის უფროსი ვახტანგ გომელაურის გადადგომა, ასევე საპარლამენტო არჩევნების ჩატარება 2020 წელს პროპორციული სისტემით.
  • ოპოზიციის ლიდერებმა აქციის მონაწილეებს პარლამენტის შენობაში შესვლისა და მისი დაკავებისკენ მოუწოდა. ხელისუფლებამ რამდენიმე საათში ძალის გამოყენებით დაარბია საპროტესტო აქცია. შედეგად დაშავდა 240-დე ადამიანი, მათ შორის, 80-მდე სამართალდამცავი. აქციაზე დაშავებულმა რამდენიმე ადამიანმა დაკარგა თვალი. ძირითადად პოლიციის მხრიდან ნასროლი რეზინის ტყვიებით დაშავდა მედიის 30-ზე მეტი წარმომადგენელი. ვიდეოკადრებში ჩანს, პოლიციელთა ნაწილი მიზანმიმართულად როგორ ესვრის რეზინის ტყვიებს მოქალაქეებს. სულ დააკავეს 300-ზე მეტი ადამიანი.
  • დარბევის შემდეგ გადადგა პარლამენტის თავმჯდომარე ირაკლი კობახიძე, ზაქარია ქუცნაშვილმა კი თქვა, რომ ტოვებს დეპუტატის მანდატს. აქციის მონაწილეებს ეს საკმარისად არ მიაჩნიათ და პროტესტს აგრძელებენ გახარიას გადადგომის მოთხოვნით, რისი მთავარი მიზეზიც აქციის დარბევაა. პროტესტის დაწყებიდან შემდეგ, “ოცნებაში“ მიიღეს გადაწყვეტილება, რომ 2020 წელს არჩევნები პროპორციული სისტემით ჩატარდეს.

ამავე თემაზე ვრცლად:

4 რამ, რაც ნიკა მელიას სასამართლომ აუკრძალა

მასალების გადაბეჭდვის წესი