თალაკვაძის მადლობა პოლიციას კვიციანის ინციდენტზე “მყისიერი რეაგირებისთვის”

პარლამენტის თავმჯდომარე არჩილ თალაკვაძე დეპუტატ ემზარ კვიციანთან დაკავშირებული ინციდენტის დროს მისი თქმით, მყისიერი რეაგირებისთვის პოლიციას მადლობას უხდის.

პარლამენტის თავმჯდომარის თქმით, იმაზე თუ რა სამართლებრივი შეფასებები უნდა მიეცეს მომხდარს, გადაწყვეტილება არა პოლიტიკოსებმა, არამედ შესაბამისმა ინსტიტუტებმა უნდა მიიღონ.

“რამდენადაც ვიცით რეაგირება იყო მყისიერი, ეფექტურად შეძლეს სიტუაციის განმუხტვა და მადლობა მინდა გადავუხადო”, – თქვა თალაკვაძემ პოლიციის მისამართით.

“სირცხვილიას” აქციების ერთ-ერთი ორგანიზატორის, ზუკა ბერძენიშვილი თქმით, პოლიციას დეპუტატ ემზარ კვიციანის პირველ ძალადობაზე რეაგირება რომ ჰქონოდა, ის ფიზიკური ძალადობის გაგრძელებას ვეღარ მოახერხებდა. ამის ნაცვლად, ბერძენიშვილის თქმით, პოლიციამ კვიციანი რუსთაველზე ასეირნა:

“ემზარ კვიციანს შევხვდით სტვენით რის საპასუხოდაც მან დაიწყო ფიზიკური ანგარიშსორება, გინება, ფურთხება. ხელი გაარტყა რამდენიმე ადამიანს მათ შორის მე. რაც ყველაზე მძიმე იყო, როდესაც მე ერთხელ ხელი დამარტყა, პოლიციას ვთხოვდით დაეკავებინათ, მაგრამ პოლიცია სადღაც რეკავდა, რაღაცებს არკვევდა და უბრალოდ მიაცილებდა ადამიანს, რომელიც ძალადობას განაგრძობდა. პოლიციას, რომ დროული რეაგირება ჰქონოდა, მე კიდევ ორჯერ ხელი არ მომხვდებოდა”, – განაცხადა ზუკა ბერძენიშვილმა.

შსს-მ ემზარ კვიციანის ინციდენტზე გამოძიება სისხლის სამართლის კოდექსის 126-ე მუხლის საფუძველზე დაიწყო.

“შინაგან საქმეთა სამინისტროს თბილისის პოლიციის დეპარტამენტის ძველი თბილისის სამმართველოში პარლამენტის შენობის მიმდებარედ მომხდარ ინციდენტთან დაკავშირებით გამოძიება საქართველოს სსკ-ს 126-ე მუხლით დაიწყო, რაც ძალადობას გულისხმობს. გამოძიების ფარგლებში, ჩატარდება ყველა საგამოძიებო მოქმედება, გამოიკითხებიან ინციდენტში მონაწილე პირები, ასევე, მოხდება არსებული ვიდეოჩანაწერების შესწავლა, რის შემდეგაც ქმედებას მიეცემა შესაბამისი სამართლებრივი შეფასება”, – ნათქვამია შსს-ს განცხადებაში.

ინციდენტი მოხდა პარლამენტის შენობის წინ, სადაც “სირცხვილიას” აქცია მიმდინარეობს მთავრობის დამტკიცების პროცედურის პარალელურად.

ინციდენტში პატრიოტთა ალიანსის წევრი დეპუტატი ემზარ კვიციანი მონაწილეობდა. მას აქციის მონაწილეები “პუტინის მონას” ეძახდნენ. კვიციანმა აქციის მონაწილეებს აგინა და ფიზიკურადაც შეეხო.

საბოლოოდ დეპუტატი ტერიტორიიდან პოლიციამ გაიყვანა.

ნეტგაზეთის მასალების სხვა გამოცემებში გადაბეჭდვის წესი
ავტორი
დათო ქოქოშვილი არის ნეტგაზეთის რედაქტორი 2018 წლის 1 თებერვლიდან. მანამდე ის იყო ნეტგაზეთის რეპორტიორი 2013 წლიდან. Email: davit.qoqoshvili@gmail.com