რუსეთის სახელმწიფო დუმის საგარეო საქმეთა კომიტეტის წევრი ევგენი პრიმაკოვი მიიჩნევს, რომ ქართველი ტელეწამყვანის, გიორგი გაბუნიას პირდაპირ ეთერში რუსეთის პრეზიდენტის გინების შემდეგ ქართულ-რუსული ურთიერთობები „უნდა გაიყინოს“ – ინფორმაციას ამის შესახებ „რია ნოვოსტი“ ავრცელებს „ტელეგრამზე“ გამოქვეყნებულ პრიმაკოვის განცხადებაზე დაყრდნობით.

„სიცივე აჯანსაღებს. უცნაურია მხოლოდ ის, რომ ამასთან შეკამათებას ცდილობენ სწორედ ქართველი ტურბო-პატრიოტები იმიტომ, რომ ისინი ყველაზე მეტად ყვირიან – „თავი დაანებეთ საქართველოს, დაგვშორდით“. – დიახ, დაგვითანხმეთ, აღარ ჩამოვალთ თქვენთან, აღარ ჩამოვფრინდებით, უკვე თქვენით გამოსცურეთ“. „ოჰ, თქვე ვერაგო მტრებო, ასე როგორ შეგიძლიათ“. შეგვიძლია. ეს ჩვენ არ გვახარებს, მაგრამ, როგორც ჩანს, აუცილებელია“, – წერს პრიმაკოვი.

რუსული გამოცემის ცნობით, რუსეთის დუმის დეპუტატი ასევე წერს, რომ მართალია, საქართველოს პრეზიდენტმა დაგმო ჟურნალისტ გიორგი გაბუნიას საქციელი, მაგრამ „ბოდიში არ გახმიანებულა.“

„როგორც ჩანს, პირდაპირი რეისების გაუქმებიდან პაუზა დღემდე გაიწელა. გაგრძელება იქნება“, – წერს პრიმაკოვი „ტელეგრამზე“.

დღეს, რვა ივლისს, საქართველოსა და რუსეთს შორის პირდაპირი ფრენები შეწყდა. რუსულ ავიაკომპანიებს საქართველოში ფრენა რუსეთის პრეზიდენტმა ვლადიმერ პუტინმა 21 ივნისს აუკრძალა. პუტინის შესაბამისი განკარგულების მიხედვით დროებითი აკრძალვის მიზანია ეროვნული უსაფრთხოების უზრუნველყოფა და რუსეთის მოქალაქეების დაცვა.

_________________

7 ივლისს „რუსთავი 2“-ის გადაცემა „P.S“-ის წამყვანმა გიორგი გაბუნიამ გადაცემა რუსულ ენაზე, რუსეთის პრეზიდენტის, ვლადიმერ პუტინის გინებით დაიწყო. ტელეწამყვანმა თავის მიმართვაში ასევე გინებით მოიხსენია რუსეთის პრეზიდენტის გარდაცვლილი მშობლები. ჟურნალისტის ამ მონოლოგს საზოგადოების ნაწილის მკვეთრად უარყოფითი რეაქცია მოჰყვა.