ქუთაისის შემოვლითი გზის გახსნის ღონისძიება 19 ნოემბერს გაიმართება. 

ინფრასტრუქტურის სამინისტროს ინფორმაციით, ქუთაისის 32-კილომეტრიანი შემოვლითი გზა  E60 აღმოსავლეთ-დასავლეთის ჩქაროსნული ავტომაგისტრალის უმნიშვნელოვანესი ნაწილია. ეს გზა საქართველოს, როგორც ევროპისა და აზიის დამაკავშირებელ სატრანსპორტო დერეფანს, ახალ შესაძლებლობებს აძლევს.

32-კილომეტრიანი მონაკვეთი ქუთაისს სატრანზიტო ნაკადისგან  განტვირთავს, ხოლო მგზავრობის ხანგრძლივობას 30 წუთით შეამცირებს. ახალი გზა ნახშირღელის მიმდებარე ტერიტორიიდან  კოპიტნარის აეროპორტის გასწვრივ არსებულ მაგისტრალს  შეუერთდება.

პროექტს რეგიონული განვითარებისა და ინფრასტრუქტურის სამინისტროს საავტომობილო გზების დეპარტამენტი ახორციელებს და იაპონიის საერთაშორისო თანამშრომლობის სააგენტო საქართველოს მთავრობასთან ერთად აფინანსებს. შესრულებული სამუშაოების ღირებულება 181 მლნ ლარს შეადგენს.

სამუშაოებზე 1000–მდე ადამიანი დასაქმდა, რომელთა უმრავლესობა ახლომდებარე სოფლებისა და ქალაქების მაცხოვრებელია.