სახელმწიფო უწყებების საკომუნიკაციო მომსახურების სურვილი მხოლოდ “ბილაინმა” გამოთქვა

სახელმწიფო შესყიდვების სააგენტოს მიერ გამოცხადებულ საკომუნიკაციო მომსახურეობის ტენდერში მხოლოდ “ბილაინი” მონაწილეობს.

წინადადებების მიღება გუშინ, 6 მარტს დასრულდა და ტენდერში მონაწილეობის სურვილი მხოლოდ შპს “ვიონი საქართველომ” (ბრენდული სახელწოდებით “ბილაინი”) გამოთქვა.

შესყიდვის ობიექტს წარმოადგენს ფიჭური სატელეფონო მომსახურება სახელმწიფო  სტრუქტურებში დასაქმებული 260 000 აბონენტისთვის.

ტენდერი ამჟამად შერჩევა-შეფასების ეტაპზეა, რომელიც უახლოეს დღეებში დასრულდება.

აღსანიშნავია, რომ ეს პირველი შემთხვევა არაა, როდესაც სახელმწიფო შესყიდვების სააგენტოს მიერ გამოცხადებულ საკომუნიკაციო მომსახურეობის ტენდერში მხოლოდ “ბილაინი” მონაწილეობს. 2018-19 წლების მომსახურების შესყიდვის ტენდერში თავდაპირველად მხოლოდ “ბილაინი” მონაწილეობდა. თუმცა მას შემდეგ, რაც კომუნიკაციების ეროვნულმა კომისიამ მიიჩნია, რომ “ბილაინი” სახელმწიფო კონსოლიდირებულ ტენდერში გამარჯვებისთვის პირობებს ვერ აკმაყოფილებდა, ტენდერი ჩაიშალა.

 

ნეტგაზეთის მასალების სხვა გამოცემებში გადაბეჭდვის წესი
ავტორი
ნინო ჩიჩუა არის "ნეტგაზეთის" რეპორტიორი 2018 წლის სექტემბრიდან.