მესამე ქვეითი ბრიგადის 31-ე ბატალიონის 300-მა სამხედრომ ავღანეთში 7 თვის განმავლობაში, ISAF-ის მისიის ფარგლებში, დაკისრებული მოვალეობა შეასრულეს. სამშვიდობოებს ალექსეევკას აეროპორტში გენერალური შტაბისა და სახმელეთო ძალების ხელმძღვანელები დახვდნენ.

საქართველოს თავდაცვის სამინისტროს ინფორმაციით, ჰელმანდის პროვინციაში ქართველმა სამხედრო მოსამსახურეებმა, აშშ-ის საზღვაო ქვეითების მხარდაჭერით, სრული სპექტრის ოპერაციები განახორციელეს. მათი მთავარი ამოცანა პროვინციის სამოქმედო არეალში მოსახლეობის უსაფრთხოების მიზნით პატრულირება და მოძრავი საკონტროლო საგუშაგოების მოწყობა იყო.

სამინისტრო აცხადებს, რომ 31-ე ბატალიონის საქართველოში ჩამოსვლა ეტაპობრივად მოხდება. ბატალიონი მიმდინარე თვის ბოლომდე სრულად დაბრუნდება საქართველოში. ისინი ავღანეთში მეორე ქვეითი ბრიგადის 23-ე ბატალიონის სამხედროებმა ჩაანაცვლეს.