ჟურნალისტი ჯამალ ხაშოგი სტამბოლში, საუდის არაბეთის საკონსულოში ჯერ მოკლეს, მერე ცხედარი დაანაწევრეს, – ამის შესახებ CNN თურქეთის ოფიციალურ პირებზე დაყრდნობით წერს.

CNN-ის ინფორმაციით, თურქეთის ოფიციალური პირები კერძო საუბრებში ამბობენ, რომ ხაშოგი 2 ოქტომბერს მოკლეს, როდესაც ის საკონსულოში მივიდა. ეს ინფორმაცია თავდაპირველად New York Times-მა, ჯერ კიდევ გამოძიების საწყის ეტაპზე გაავრცელა, თურქეთის პოლიციის მიერ საკონსულოში ჩატარებული ჩხრეკის შემდეგ ეჭვი კიდევ უფრო გაძლიერდა.

ჟურნალისტი ჯამალ ხაშოგი ბოლოს სტამბოლში, საუდის არაბეთის საკონსულოში 2 ოქტომბერს ნახეს. იგი Washington Post-ის მესვეტეა და BBC-ის თანახმად, საუდის არაბეთის სამეფო ოჯახთან დაახლოებელი პირი იყო, თუმცა ბოლო წლებში საუდელ პრინც მუჰამედ ბინ სალმანს აკრიტიკებდა.

თურქეთის თანახმად, ხაშოგის “გაუჩინარებაში” გარეულია 15 ადამიანი საუდის არაბეთიდან, რომლებიც 2 ოქტომბერს ჩაფრინდნენ თურქეთში და მალევე უკან დაბრუნდნენ.

საუდის არაბეთი მკვლელობის ვერსიას უარყოფს და აცხადებს, რომ ხაშოგიმ საკონსულოს შენობა დატოვა, თუმცა ამ ვერსიის დამადასტურებელი საბუთი არ წარუდგენიათ.