საქართველოს სახალხო დამცველოს ოფისის ინფორმაციით, 2018 წლის 6 აგვისტოს ომბუდსმენმა ნინო ლომჯარიამ რეკომენდაციით მიმართა შპს ჯორჯიან ეარვეისს, რომელმაც შეზღუდული გადაადგილების შესაძლებლობის მქონე პირი არ უზრუნველყო ეტლით.

როგორც ომბუდსმენის მიერ გავრცელებულ განცხადებაშია აღნიშნული კომპანიის ვებ-გვერდზე მითითებული ინფორმაციის თანახმად, ეტლით სარგებლობისთვის საჭირო იყო წინასწარი გაფრთხილება 72 საათით ადრე. ვინაიდან მოქალაქის გამგზავრება, მისი ჯანმრთელობის მდგომარეობიდან გამომდინარე, უფრო მცირე დროით ადრე დაიგეგმა, აეროპორტში რეგისტრაციის გავლისას, მან კომპანიის წარმომადგენლისგან ეტლის გამოყოფაზე უარი მიიღო, სხვა თანამშრომელმა კი 104 ევროს გადახდა მოსთხოვა. ავიაკომპანიის ვებ-გვერდზე ამ საფასურის შესახებ არაფერი იყო მითითებული. შეზღუდული შესაძლებლობის მქონე პირი იძულებული გახდა ფეხით გადაადგილებულიყო, რამაც ჭრილობიდან სისხლდენა გამოიწვია.

სახალხო დამცველმა მიიჩნია, რომ განმცხადებელმა სხვა შეზღუდული მობილობის მქონე იმ პირებისგან განსხვავებით, რომლებსაც შესაძლებლობა აქვთ რეისამდე 72 საათით ადრე გააფრთხილონ ავია-გადამყვანი სპეციალური საჭიროების თაობაზე, ვერ გამოიყენა მისთვის განკუთვნილი სპეციალური მომსახურება, რამაც, თავის მხრივ, მძიმე შედეგი გამოიწვია. გარდა ამისა, განმცხადებლისთვის ეტლით მომსახურების დამატებითი ხარჯების მოთხოვნით, განმცხადებელი სხვა მგზავრებთან შედარებით, დისკრიმინაციულ მდგომარეობაში ჩაყენების საფუძველი გახდა.

სახალხო დამცველმა “ჯორჯიან ეარვეისს”  რეკომენდაციით მიმართა, ვებ-გვერდზე დეტალურად გაწეროს შეზღუდული შესაძლებლობის და მობილობის მქონე მგზავრების უფლებები; ასევე, უზრუნველყოს საკუთარი პერსონალისთვის შეზღუდული შესაძლებლობის და მობილობის მქონე პირების სპეციფიური საჭიროებების შესახებ ინფორმაციის მიწოდება.

“ჯორჯიან ეარვეისის” პასუხი

ავიაკომპანია “ჯორჯიან ეარვეისის” იურისტმა სალომე თოთიბაძემ ნეტგაზეთს უთრა, რომ კომპანია იზიარებს ომბუდსმენის რეკომენდაციებს და ითვალისწინებს, რათა მომავალში მსგავსი ფაქტი არ მოხდეს.

“თუმცა აქვე გვინდა კომენტარი გავაკეთოთ და გაცნობოთ, რომ სსიპ სამოქალაქო ავიაციის სააგენტოს დირექტორის 2013 წლის 30 იანვრის ბრძანება N16-ში, “საჰაერო გადაყვანა-გადაზიდვისას შეზღუდული შესაძლებლობის მქონე პირთათვის დახმარების აღმოჩენის წესის” დამტკიცების შესახებ, აღინიშნება ხარვეზი, არ არის რეგულირებული კონკრეტული შემთხვევები თუ როგორ უნდა მოიქცეს ავიაკომპანია, როცა არ ხდება ინფორმაციის მიწოდების ვადების დაცვა. ამასთანავე, მიუხედავად იმისა, რომ პრეტენზიის მქონე მგზავრმა ბილეთი შეიძინა გაფრენამდე ერთი დღით ადრე, შეტყობინება ეტლით სარგებლობის შესახებ აღნიშნულ დროსაც არ მიუწოდებია კომპანიისთვის”, – აცხადებს “ჯორჯიან ეარვეისის” იურისტი.

იურისტისვე განმარტებით, სწორედ აღნიშნული ვადების დაუცველობის გამო შეიქმნა პრობლემა, რომელსაც ავიაკომპანია უწესებს შეზრუდული შესაძლებლობის მქონე პირებს.  გამომდინარე იქედან, რომ ავიაკომპანიას არ გააჩნია რესურსი შეზღუდული შესაძლებლობის პირი უზრუნველყოს ეტლით და მსგავსი მომსახურებისთვის მიმართავს აეროპორტის ოპერატორებს. 

“ჯორჯიან ეარვეისი” ასევე განმარტავს, რომ მათ მგზავრისთვის არ მოუთხოვიათ ეტლით სარგებლობისთვის დამატებითი საფასური, შესაბამისად ამ საკითზე კომენტარს ვერ გააკეთებენ.

“ავიაკომპანია გამოთქვამს სრულ მზადყოფნას, მაქსიმალურად შევუწყოთ ხელი არსებულ საკითხთან დაკავშირებული ყველა ხარვეზის აღმოფხვრას, მომავალში მსგავსი ფაქტების პრევენციის მიზნით”, – აცხადებს “ჯორჯიან ეარვეისი”.