ნეტგაზეთი | ქევხიშვილი: ხაბარელი ცეცხლზე ნავთს ასხამს და ვითარებიდან სარგებლის მიღებას ცდილობს ქევხიშვილი: ხაბარელი ცეცხლზე ნავთს ასხამს და ვითარებიდან სარგებლის მიღებას ცდილობს – Netgazeti
Batumelebi | RU

ქევხიშვილი: ხაბარელი ცეცხლზე ნავთს ასხამს და ვითარებიდან სარგებლის მიღებას ცდილობს

ძიუდოს ფედერაციის პრეზიდენტი დავით ქევხიშვილი გადადგომას არ აპირებს. ამის შესახებ მან ტელეკომპანია “იმედის” გადაცემაში “პირისპირ” განაცხადა. ქევხიშვილის თქმით, უსაფუძვლო ბრალდებების ფონზე, მისთვის მთავარი არა თანამდებობა, არამედ პრეზიდენტის ინსტიტუტის დაცვაა.

“იმ ფორმატში, რა ფორმატშიც და რა მიზეზების გამოც სპორტსმენთა ეს ჯგუფი ამას ითხოვს, ეს არის უსაფუძვლო და, ბუნებრივია, არ ვაპირებ[გადადგომას]. აქ არ არის საუბარი იმაზე, რომ მე პოსტს ჩავებჭაუღო. აქ საუბარია, რომ ზოგადად ფედერაციის პრეზიდენტის ინსტიტუტს სჭირდება დაცვა. სამწუხაროდ, ეს პირველად არ ხდება. ეს ხდებოდა 2009 წელს, ხდებოდა ადრეც და, ბუნებრივია, მე მაქვს ვაკლდებულება იმ ადამიანთა მიმართ, ვინც ამირჩია”, – აღნიშნა მან.

ქევხიშვილი მიიჩნევს, რომ მის წინააღმდეგ დაწყებული პროტესტი მართულია და პროცესების უკან კონკრეტული პირები დგანან. კითხვაზე, თუ ვინ არიან ისინი, ძიუდოს ფედერაციის პრეზიდენტი ზურაბ ზვიადაური და საპარლამენტო უმრავლესობის წევრი შოთა ხაბარელი დაასახელა, რომლებიც ქევხიშვილის გადადგომას უჭერენ მხარს.

“ფაქტია, რომ პრობლემა არსებობს, თუმცა ის ახლა არ დაწყებულა. ასეთი დაძაბული რეჟიმი მე 4 წლის განმავლობაში არაერთხელ მქონია. თუმცა ის ადამიანები, რომლებიც ამის უკან დგანან და როგორც მინიმუმ სურვილი აქვთ პროცესების ესკალაციის, იგივე ხაბარელი, რომელიც გამოდის და მწვავე განცხადებებს აკეთებს, თუნდაც ზვიადაური ან ნებისმიერი სხვა ადამიანი… მაშინ, როდესაც მათ არგუმენტირებულად არ სურთ საუბარი ამ საკითხთან დაკავშუირებით და მხოლოდ აპელირებენ რაღაც უსაფუძვლო ბრალდებებით”.

ჟურნალისტის კითხვაზე, რა მიზანი შეიძლება ჰქონდეს შოთა ხაბარელს, ქევხიშვილი აღნიშნავს:

“…ის, რაც ჰქონდა 2012 წელს. რომ უნდოდა, მოსულიყო ის და მისი გუნდი ფედერაციაში, მათ ეს ვერ შეძლეს… ის არის ცეცხლზე ნავთის დამსხმელი, რომელიც ფიქრობს იმაზე, რომ გამორჩეს ამ ვითარებას და აქედან მიიღოს გარკვეული სარგებელი. ჩემთვის მისი ქმედებები და განცხადებები ტოვებს მხოლოდ ამ შთაბეჭდილებას და სხვას არაფერს”.

დავით ქევხიშვილის თქმით, მან რამდენიმე საათში გასცა პასუხი იმ 23 შეკითხვას, რომლებიც პროტესტის მონაწილე ძიუდოისტებმა წარუდგინეს. ქევხიშვილის განცხადებით, ფაქტი, რომ აღნიშნული კითხვები ძიუდოისტებმა ევროპის ჩემპიონატიდან დაბრუნების შემდეგ სულ 2 დღეში წარუდგინეს, აჩვენებს, რომ პროცესები ან მართულია, ან ისინი მანამდეც იგიგმებოდა.

“მე ვთქვი, რომ ეს არის მართული პროცესი გამომდინარე იქიდან, თუნდაც ის 23 კითხვიდან, რომელიც ევროპის ჩემპიონატიდან დაბრუნებიდან 2 დღეში ჟღერდება კაპიტნისგან. თუკი ეს არ არის მართული, მაშინ გამოდის, რომ ის ამაზე ფიქრობდა ელემენტარულად ევროპის ჩემპიონატზე. სხვათა შორის, მაშინ განვაცხადე, რომ ნაადრევად მიგვიღია გადაწყვტეილება, როცა მთავარი მწვრთნელი დავითხოვეთ პოსტიდან, გამომდინარე იქიდან, რომ როცა სპორტსმენთა გუნდი იმ პრობლემებზე ფიქრობს, რომელთა დიდი ნაწილიც მას არ ეხება, ბუნებრივია, ევროპის ჩემპიონატზე კი არა, ჩვეულებრივ ტურნირზეც ვერ მიაღწევს წარმატებას”, – აცხადებს ფედერაციის პრეზიდენტი “იმედთან” საუბრისას.

დავით ქევხიშვილის თქმით, ძიუდოისტებთან დიალოგისთვის მზად არის, თუმცა მხოლოდ მედიის დაუსწრებლად.


ძიუდოისტებმა, რომლებიც ძიუდოს ფედერაციის პრეზიდენტის გადადგომას ითხოვენ, 23 მაისს დავით ქევხიშვილის კაბინეტის კარი აჭედეს. მათი თქმით, ქევხიშვილის სამუშაო ადგილზე შეშვებას არ აპირებენ და მის დაუყოვნებლივ გადადგომას მოითხოვენ. ძიუდოისტებმა ფედერაციის პრეზიდენტის ოთახიდან სიმბოლურად გამოიტანეს სავარძელიც. დღის ბოლოს აქციის მონაწილეები დაიშალნენ, თუმცა განაცხადეს, რომ 23 მაისს, 11:00-ზე კვლავ ფედერაციის შენობასთან შეიკრიბებიან.

ძიუდოს ფედერაციაში მიმდინარე დაპირისპირების აღმოსაფხვრელად 2 კვირის წინ ერთობლივი კომისიაც შეიქმნა. მასში კულტურისა და სპორტის სამინისტრო, პარლამენტის სპორტისა და ახალგაზრდულ საქმეთა, ასევე ოლიმპიური კომიტეტი შედიან და  ფედრაციაში არსებულ პრობლემებთან ერთად ქევხიშვილის მიმართ ძიუდოისტების მიერ წაყენებულ ბრალდებებს სწავლობენ.

დავით ქევხიშვილის გადადგომის მოთხოვნა ქართველმა ძიუდოისტებმა 4 მაისს გაახმიანეს და პროტესტის ნიშნად ვარჯიში შეწყვიტეს. სპორტსმენები ამბობდენ, რომ ნაცვლად იმისა, ივარჯიშონ მშვიდ გარემოში, მუდიმივად სტრესის ქვეშ უწევთ ყოფნა. მათი თქმით, ეს ყველაფერი უკავშირდება დავით ქევხიშვილის ერთპიროვნულ მმართველობასა და ფედერაციაში დაგროვილ პრობლემებს.

მანამდე, ევროპის ჩემპიონატის უმედლოდ დასრულების შემდეგ, იგივე მოითხოვა ვეტერანმა ძიუდოისტმა ზურაბ ზვიადაურმაც. კითხვაზე, ხომ არ არის პროცესები ზვიადაურისგან მართული, ძიუდოისტი ვარლამ ლიპარტელიანი აღნიშნავდა, რომ ასე არ არის, ვინაიდან დარწმუნებულია, რომ ზვიადაურს თანამდებობის დაკავების ინტერესი არ აქვს და თუ ეს ასე მოხდება, თავად წავა ნაკრებიდან.

საპასუხოდ, ქევხიშვილი “რუსთავი2”-თან საუბრისას აცხადებდა, რომ „უსაფუძვლო ბრალდებების გამო რაღაც ნაბიჯებს უკან ვერ გადადგამს“. ფედერაციის ხელმძღვანელი მიიჩნევს, რომ მისი მოწინააღმდეგებისგან დღემდე ვერ მოისმინა არგუმენტი, თუ რატომ უნდა გადადგეს.

 

 

ნეტგაზეთის მასალების სხვა გამოცემებში გადაბეჭდვის წესი
ავტორი
მიხეილ გვაძაბია არის ნეტგაზეთის რეპორტიორი 2017 წლის სექტემბრიდან