“ეს ტერაქტი დღეს გახსნილია და დადგენილია ადამიანები, რომლებიც მის განხორციელებაში მონაწილეობდნენ. ის ადამიანნები, რომლებმაც ეს განახორციელეს, თავისით ვერ დაგეგმავდნენ და რომც დაეგეგმათ, მაშინვე საპყრობილეში იქნებოდნენ”, – განაცხადა სუბარმა.
მისივე თქმით, როცა ეს ფაქტი მოხდა, მეორე დღეს მასთან, როგორც სახალხო დამცველთან, მივიდნენ ნორვეგიელი და შვედი დამკვირვებლები, რომლებიც ამ საქმეს სწავლობდნენ:
“მათ პირდაპირ დეტალებში გააკეთეს განცხადება, რომ ეს იყო აბსოლუტურად დაგეგმილი ტერაქტი და ვერ იჯერებდნენ, რომ ასეთი რამ შეიძლებოდა მომხდარიყო ქვეყანაში. ამის შემდეგ იყო ჟურნალისტური გამოძიება, “რუსთავი 2″-ს აღბეჭდილიც აქვს, როგორ ხვდება ტყვია დაზარალებულს, როგორ ყვირის, თუმცა მიუხედავად მტკიცებულებებისა, მაშინდელმა გამოძიებამ არაფერი გააკეთა,” – აცხადებს სუბარი. მისი თქმით, არ არის გამორიცხული, რომ გამოძიება ამ საქმეზე სხვა მაღალი თანამდებობის პირების პასუხისმგებლობაზეც გავიდეს.
შსს-მ გუშინ ხურჩაში ხუთი წლის წინ მომხდარი აფეთქების ფაქტზე ტერაქტის ბრალდებით დააკავა კონსტიტუციური უსაფრთხოების დეპარტამენტის აფხაზეთის ავტონომიური რესპუბლიკის მთავარი სამმართველოს ყოფილი უფროსი რომან შამათავა და შინაგან საქმეთა სამინისტროს სამეგრელო-ზემო სვანეთის სპეციალურ ღონისძიებათა ცენტრის განსაკუთრებულ დავალებათა დეპარტამენტის სამმართველოს ყოფილი თანამშრომელი მალხაზ მურღულია.