ლაშა მესხი: სასამართლომ საზმაუს ჩემი სამსახურში აღდგენა დაავალა

თბილისის საქალაქო სასამართლომ საზოგადოებრივ მაუწყებელს მისი ყოფილი თანამშრომლის, ლაშა მესხის სამსახურში აღდგენა დაავალა. ამის შესახებ ლაშა მესხი აცხადებს.

მისი ინფორმაციით, საზოგადოებრივ მაუწყებელს მისი სამსახურში აღდგენა განაცდურის სრული ოდენობის ანაზღაურებასთან ერთად დაევალა .

მოვიგეთ!!! საზმაუმ დავა წააგო. სასამართლომ დაადგინა ჩემს მიმართ განხორციელებული პროფკავშირული ნიშნით დისკრიმინაცია და …

Posted by Lasha Meskhi on 2018 წლის 29 მარტი, ხუთშაბათი

ნეტგაზეთი დაუკავშირდა საზოგადოებრივი მაუწყებლის ადვოკატს, დიმიტრი ბერძენიშვილს, რომელმაც განაცხადა, რომ ჯერჯერობით ზუსტი ინფორმაცია არ აქვს, თუმცა, დიდი ალბათობით, საზმაუ სასამართლოს აღნიშნულ გადაწყვეტილებას გაასაჩივრებს.

რაც შეეხება ლაშა მესხს, ნეტგაზეთისთვის მიცემულ კომენტარში განმარტა, რომ, მიუხედავად იმისა, სასამართლო დავა ერთი წელიწადი მიმდინარეობდა, ეს იყო პირველი შემთხვევა, როდესაც პროფკავშირული ნიშნით დისკრიმინაცია დადგინდა. მისივე თქმით, იმ შემთხვევაში, თუ საზმაუ გადაწყვეტილებას გაასაჩივრებს, მზად არის საქმეს ბოლომდე გაჰყვეს.

1 თებერვალს თბილისის საქალაქო სასამართლოში საზოგადოებრივი მაუწყებლის ყოფილი ჟურნალისტის და მედიის პროფესიული კავშირის ხელმძღვანელის, ლაშა მესხის შესაძლო დისკრიმინაციული წესით სამსახურიდან გამოშვების საკითხის განხილვა დაიწყო.

ლაშა მესხი შრომითი ხელშეკრულებების საფუძველზე  „საზოგადოებრივ მაუწყებელში“ 2014 წლიდან მუშაობდა. მესხი აცხადებს, რომ 2016 წლის მაისში დააფუძნა პროფესიული კავშირი და „საზოგადოებრივი მაუწყებლის“ მიმართ ხშირად გამოთქვამდა საჯაროდ კრიტიკულ მოსაზრებებს.

2017 წლის იანვრის ბოლოს, სხვა 12 თანამშრომლის მსგავსად, განმცხადებელთან ერთთვიანი შრომითი ხელშეკრულება დაიდო. ხელშეკრულების ვადის გასვლის შემდეგ შრომითი ურთიერთობა მხოლოდ ლაშა მესხთან არ გაგრძელდა, რის საფუძვლადაც “საზოგადოებრივმა მაუწყებელმა” ხელშეკრულების ვადის გასვლა დაასახელა.

საზოგადოებრივ მაუწყებელს 2017 წლის ივნისში საქართველოს სახალხო დამცველმა და ჟურნალისტთა საერთაშორისო ფედერაციამ ლაშა მესხის სამსახურში აღდგენის რეკომენდაციით მიმართეს, მაგრამ არხის მენეჯმენტმა მათი რჩევა/მოთხოვნა არ გაითვალისწინა.

ნეტგაზეთის მასალების სხვა გამოცემებში გადაბეჭდვის წესი
ავტორი
ნინო ბიძინაშვილი არის რეპორტიორი 2017 წლის 25 სექტემბრიდან