ღვინის ეროვნული სააგენტოს მონაცემებით, 2017 წლის იანვარ-მაისში საქართველოდან მსოფლიოს 41 ქვეყანაში ექსპორტირებულია 24,75 მლნ ბოთლი ღვინო, რაც 64%-ით აღემატება გასული წლის ანალოგიურ მონაცემებს.
საანგარიშო პერიოდში ექსპორტირებულია 55,52 მლნ აშშ დოლარის ღირებულების ღვინო, რაც 58%-ით აღემატება გასული წლის ამავე პერიოდის მაჩვენებელს.
„მიმდინარე წლის იანვარ-მაისის მდგომარეობით, ღვინის ექსპორტი 2016 წლის ანალოგიურ პერიოდთან შედარებით 64%-ით გაიზრდა. ასევე გაზრდილია ღვინის რეალიზაციით მიღებული შემოსავლები და საექსპორტო ქვეყნების გეოგრაფიაც, რაც მიიღწევა ღვინის ეროვნული სააგენტოსა და მეღვინეობის დარგის შეთანხმებული ღონისძიებებითა და სწორად დაგეგმილი მარკეტინგული სტრატეგიის საფუძველზე. ექსპორტი მატება დაფიქსირდა ევროკავშირის ქვეყნების, ჩინეთის, აშშ-ის და აგრეთვე ტრადიციული ბაზრების მიმართულებით“ – აღნიშნა ღვინის ეროვნული სააგენტოს თავმჯდომარემ, გიორგი სამანიშვილმა.
ღვინის ეროვნული სააგენტოს მონაცემებით, ექსპორტის მატება აღსანიშნავია შემდეგ ქვეყნებში:
- ჩინეთი – 160% (3 234 144 ცალი ბოთლი),
- პოლონეთი – 17% (978 360),
- აშშ – 54% (148 470),
- ბელარუსი – 59% (416 962),
- უკრაინა – 28% (2 364 112),
- რუსეთი – 96% (14 820 976),
- გერმანია – 18% (167 296),
- ლატვია – 17% (547 946),
- საფრანგეთი – 500% (89 986),
- ისრაელი – 253% (92 310),
- აზერბაიჯანი – 202% (77 202)
ექსპორტიორი ქვეყნების პირველი ხუთეულია:
- რუსეთი -14 820 976,
- ჩინეთი -3 234 144,
- უკრაინა – 2 364 112,
- ყაზახეთი – 1 048 195,
- პოლონეთი – 978 360 ბოთლი.
ამასთან, მსოფლიოს 17 ქვეყანაში ექსპორტირებულია 5 521 594 ბოთლი (0,5 ლ) ბრენდი, რაც 66%-ით აღემატება 2016 წლის ამავე პერიოდის მაჩვენებელს. სულ ექსპორტირებულია 13,3 მლნ აშშ დოლარის ღირებულების ბრენდი – მატება გასული წლის ანალოგიურ პერიოდთან შედარებით 73%-ს აღწევს.
სააგენტოს ცნობით, საანგარიშო პერიოდში მსოფლიოს 16 ქვეყანაში ექსპორტირებულია 73 586 ბოთლი (0,5 ლ) ჭაჭა, ექსპორტის ზრდამ 95% შეადგინა. ჭაჭის ექსპორტით მიღებული შემოსავლები 205,2 ათას აშშ დოლარს შეადგენს, ზრდამ გასული წლის საანგარიშო პერიოდთან შედარებით 47%-ს მიაღწია.
“მთლიანობაში, ღვინის, ბრენდის, ჭაჭის, ღვინომასალის, ჩამოსასხმელი ბრენდისა და საბრენდე სპირტის ექსპორტის შედეგად მიღებული შემოსავლები საანგარიშო პერიოდში 100,8 მლნ აშშ დოლარს შეადგენს – ზრდამ 2016 წლის ამავე პერიოდთან შედარებით 64% შეადგინა”, – ნათქვამია სააგენტოს განცხადებაში.
